Turin khawpuiah ATP Finals 2024 khelh chhunzawm a ni a, champion tura rinkai Carlos Alcaraz chu Casper Ruud hneh lovin a tlawm nghal. Alcaraz a tlawm lai hian Alexander Zverev chuan set hloh lovin Andrey Rublev a hneh ve thung.
Norway star Casper Ruud hian vawi li a hmachhawn tawha a la hneh loh vek Carlos Alcaraz lakah bul a tan tha viau a, set khatnaah break a nei zawn thei hial. Set khatnaah hian rin phak baka thain a khel a, game khat chiah a hloh a, awlsam zetin set hmasa a la.
Chhe taka bul a tan hnuin set hnihnaah Alcaraz a insiamtha hret a, Ruud nen inkhel hmuhnawm zawk an lantir. Set hnihnaah Alcaraz hian break a nei hmasa a, set lak theihna hun remchang zet mai a nei. Set la ngei tura ngaih a nih tawh laiin a khingpui er let a tuar lova, a serve a hum thei lo zawn. 5-5 a nih hnuin Ruud hian pui zetin game a la zawn ta mai a, Alcaraz lakah hian 6-1, 7-5 in hnehna a chang zui ta a ni.
A vawi khat nan Alcaraz a hneh nawlh vangin Ruud hi inrintawkna sang zawk nen a inlan zui thei dawn a. Alexander Zverev leh Andrey Rublev te te paltlangin semi-final luh ngei a tum ngei dawn. Ruud lakah tlawm ngal mah se Alcaraz pawh hian Zverev leh Rublev a hmachhawn zui leh dawn a, semi final luh theihna hun tha tak a la nei ve bawk.
John Newcombe Group-a inkhel dangah champion hlui Alexander Zverev chuan a khingpui Andrey Rublev chu set hloh lovin a hneh.
German star Zverev leh Russian star Rubleve te hian hmuhnawm takin bul an tan a, an inkhel tawk hle. Set khatna leh set hnihnaah Zverev hian break pawimawh tak a nei ve ve a. Rublev lakah hian 6-4, 6-4 a hnehna changin, tha takin bul a tan.
Bul tan tha lo Alcaraz
