Bung bangla-ah sa sawngbawlna siam tum
Mizoram Food & Allied Industries Corporation (MIFCO) chuan Bung Bangla-ah anmahni hmunah sa talhna leh a sawngbawl zuina hmunpui siam an tum a, February thla chhung hian an thawhpui turte nen thuthlung (MoU) peihfel hman an tum tih an chairman Lalthazuala Rawite chuan a sawi.
MIFCO Board of Directors chuan Nilaini khan Sairang, Bung Bangla leh Chhingchhipa MIFCO hmunhma hrang hrang an tlawh a, hmalakna thar leh hmalak dan tur an enfiah. MIFCO chairman chuan sawrkar hmasaten bul an lo tan tawhna azarah MIFCO chuan hmunhma an nei tha em em a, chutihrualin a enkawl zui kawngah erawh an hmunhma hian ngaihthah a hlawh hle a. Building hlui leh rawp tawh tak tak, quarters hlui leh khawl hlui tawh tak tak an chhawm a. Bul tan that leh dawn pawhin thil huphurhawm tak a ni tih a sawi.
“Kan sawrkar tirh phat atangin MIFCO kaltlang hian kuthnathawktute leh thalai mahni kutkea eizawnna bul tan tumte an ‘bana kaih’ theih beiseiin bul kan tan chho a, Bung Banglaah sa talhna hmunpui siam kan tum. February thla tawp lamah hian MoU peihfel hman kan tum a. Hetah hian vawk talhna buaipui hmasak a ni dawn a, sa hring chauh niloin sa tin leh sausage siam kan tum. Chhingchhipah pawh sapthei kan her tan tawh a, sapthei juice hralh tur kan nei tep tawh. Sairang MIFCO ah mineral water bottle-in siam kan tum a, kan hmalakna hian thalaite tan hnathawh tur engemawzat a siam belh kan beisei,” a ti.
Ran vulhte leh kuthnathawka eizawngte tan MIFCO chu malsawmnaah chantir an tum tih Lalthazuala Rawite hian sawiin, “Chutiang tur chuan ZPM kan sawrkar phat atangin nasa takin hma kan la a, sawrkar lama kan hotuten min tuipui bawk a, kan tum anga thil a kaltluan chuan ZPM policy hi MIFCO hian a takah kan chantir ngei ang” a ti.
Bung bangla-ah sa sawngbawlna siam tum
