Daily Newspaper

Bungraw phurtu Covid kai hmuh belh; Oil phurtute rawn lut leh tan tawh

39

Vairengte screening point-a Mizorama bungrua, nitin mamawh phurluttute zingah Covid-19 kai hmuh belh zel an ni a. Oil phurtuten thil phut neia an tlan duh loh hnu ah sawrkar nen inremsiamin an oil phurh an rawn tlanluh pui leh tan tawh.

The Aizawl Post thudawn danin, Nilaini tlai atanga Ningani tlai thleng khan Vairengte screening point-a bungraw phur driver leh handyman te Rapid Antigen Test neihah Covid-19 kai mi 12 hmuhbelh a ni a, an vai hian hnamdang vek an ni.

Health Department chhinchhiah danin, Vairengte screening point paltlang zawng zawngte August 10 tlai atanga Rapid Antigen Test-a endik a nih hnuah Mizorama rawn lut mi 768 endik an ni tawh a, hnamdang driver leh handyman rawn lut endik zingah 27 chu Covid kai an ni tih hmuhchhuah a ni. Covid kai hmuhchhuah hi nitin a tam tial tial a, August 12 zan atanga August 13 tlai, darkar 24 chhung khan hri kai 12 hmuhchhuah niin, Vairengtea RAT test kalpui hnua hmuhchhuah tam ber a ni. Heti hian Covid-19 kai hnamdang driver leh handyman enkawl lai Kolasib district-ah mi 79 an awm tih thu dawn a ni.

Hetihlai hian petrol leh diesel phur, an kal hun tur bik phuta August 8 atanga Mizorama rawn lut duh tawh lo oil tanker-te chu Ningani tlai dar 4.00 khan an rawn lut leh tan a, Borkhola Bottling Plant atangin Mizoram load chu vawiin atangin a rawn lut tan dawn nia thu dawn a ni.

Lirthei dang kalruala kal ve duhloa, kar kalta Inrinni atanga Mizoram lut duh tawh lo oil tanker driver-te hi, an phut angin a hranpaa Mizorama an luh hun tur bituk sak an nih avangin Ningani tlai atang khan Mizoram an rawn lut leh tan a ni.

Thudawn danin LPG phur hi rawn lut tawk awm mah se, Vairengte screening point-ah RAT hmanga endik man Rs. 2500 chawi a ngai tia thu lo vawrhdarh an awm avangin Silchar lama Driver Union-ten Borkhola atanga Mizoram load kal tur chhuah an phal loa, nimin lam khan Vairengte SDO (Civil) leh Vairengte Police hotuten an hrilhfiah hnuah vawiin atang hian Borkhola atangin Mizoram chan tur a rawn kal tan leh dawn nia sawi a ni.

Supply department hotute sawi danin, an thil phut tihhlawhtlin a nih hmaa Bagha leh Lailapur vela la tawi khawmuang oil phur truck 12 leh LPG phur truck 2 chu Ningani tlai dar 4.00 vel khan Vairengte police-ten Mizoram an luhpui a; hei bakah hian nitin mamawh phur truck engemawzat Rapid Antigen Test-a fihlim (negative) chuan Vairengte check gate hi an rawn paltlang tawh bawk a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy