Daily Newspaper

Bungraw phurtu zingah Covid kai 18 hmu

10

Aizawl, August 8 : Kolasib district thuneituten an district huamchhunga kawng chhia vanga lirthei lian bungraw phur tangkhang mek khalhtute leh handyman-te a vawikhat endiknaah Covid-19 kai 18 a hmuchhuak nghal a, an dinna bulhnaia cheng civil mi pakhat pawhin a kai tih hmuhchhuah a ni. Hei vang hian Mizoram sawrkar chuan nitin mamawh phur lirthei tih loh bungraw phur dangte chu Mizorama luhtir rih lo turin a ti nghal.

National Highway 306 (Kolasib district chhung) siamthat hna thawh meka kawng hawn hunbi siam avanga lirthei tangkhang khalhtu leh handyman-te, Covid-19 hri kai leh kai loh endik hna chu Kolasib district bawrhsap ruahmanna in Ningani zan atang khan kalpui a ni a. Zirtawpni zing dar 9 thleng khan mi 320 endik hman niin, truck khalhtu leh handyman zingah Covid kai mi 18 hmuhchhuah an ni tawh a, Sethawna lirthei dinna bula awm chhungkaw pathum awmte chu enfiah an nih hnuah naupang kum 12 mi chuan Covid a lo kai ve hman tih hmuhchhuah a ni bawk.

An vai hian natna langchhuak lo (asymptomatic) vek an ni.

Kolasib bawrhsap Dr H. Lalthlangliana chuan lirthei khalhtu tangkhangte Rapid Antigen Test hmanga endik kalpui chungchangah sawrkar hmalakna sawi-fiahin, state pawn atanga bungraw phur lirthei lo lutte a khat tawka endikna kalpui thin chu Mizoram mipui him zawk nan an vaia Rapid Antigen Test neih tula an hriat thu a sawi a, kawng siam avanga lirthei innghak-khawm thin chu remchanga la in Screening Team-ten August 6 atang khan ngawrh taka endik hna an kalpui thu a sawi a ni. Positive hmuhchhuah thar 19-te hi CCC Polytechnic Thingdawlah khunghran nghal an ni a, hri kaite hnaivaia khawsa positive ve lo te pawh fimkhur thuhlaah enthlak tura khunghranna hmuna dah an ni a, an ni hi mi 22 an ni.

Zawhna chhangin DC Kolasib chuan Hmawngkhawthlir, Kolasib leh Sethawn inkar bak containment zone puan belh tumna a awm loh thu a sawi a. Containment zone-a puan hi Health Department lamin Rapid Antigen Test hmanga lirthei tangkhang driver leh handyman te an test zawh a, tih tur ang ang tihfel a nih hunah hlih chauh a nih tur thu a sawi.

Chief medical officer Dr Lalhlimpuia’n chanchin-bumite zawhna a chhan danin, lirthei dingkhawm an tam em avangin Ninganni khan ‘random test’ neih ve hrim hrim nise, tiin, Medical Team chuan Rapid Antigen Test hi an nei a, Covid-19 kai pathum hmuhchhuah an ni ta a ni. Driver leh handyman zingah hri kai an awm tih hriat a nih veleh district bawrhsap hoin thutkhawm hmanhmawh neih zui a ni a; Hmawngkhawthlir leh Sethawn inkar chu Containment Zone-ah puang nghalin, Ningani zan dar 6.00 atang khan lirthei leh mihring containment zone-ah hian phalna nei chin bak luh phal a ni lo, a ti. A tul anga test kit pawh chahbelh mek a nih thu leh ngawrh taka test hi kalpui chhunzawm a nih thu a sawi a ni.

Hetianga Covid kai hmuhchhuah a nih hnu ah test emaw khunghran emaw hlauh vang nge, an road ration neih tawh loh vang tih hriat lohin bungraw phur lirthei tangkhang thenkhat chu Lailapur lama let leh tumin an tlanlet hlawm a, Vairengte lamah dan vek niin kawngpui dungah heng lirthei leh khawtual mite an inpawlh loh nan Sub-Hqrs. YMA Kolasib hruaitute chu mobile duty-in an kal a, lirthei tangkhang ho hi eitur – buhfai leh chawhmeh bakah tui an pe tih thu dawn a ni.

Hetihlai hian Zirtawpni chawhnu dar 1.00 atang khan bungraw phur lirthei khalhtute leh handyman-te hi Sethawnah Rapid Antigen Test neih chhunzawm a ni a, khawchhia vangin mi 20 vel bak endik hman a ni loa, heti chinah hi chuan positive an awm belh rih lo tih thudawnna hian a sawi bawk.

Zirtawpni chawhnu lama Kolasib SP Vanlalfaka Ralte report danin, containment zone chhungah mipui him tlan nan leh lirthei khalhtute vil turin police duty tir an ni a, lirthei 572 endik hmabak an awm mek a, Mizorama luh tum Lailapur lamah lirthei 107 ding a awm. Lirthei khalhtute leh an chuanpui endik tawh, result negative-te chu tlantlang tir zel an ni a, report a pek lai thleng hian lirthei 89 containment zone atang hian chhuah an ni tawh a ni.

Thudawn danin lirthei 500 chuang ding mek zingah hian 100 vel chauha a khalhtu leh handyman-te la endik an ni a. Tuna endik bak hi mi 700 vel chu endik ngai la awma ngaih a ni.

THE AIZAWL POST
~Tualchhung~

HOME>> The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy