Bungtlang ‘S’ ah BDO office
leh RD Rest House siam thar
Lawngtlai district Bungtlang ‘S’ a Block Development Office -cum- Panchayat Bhavan building sak thar leh Rural Development Department Rest House thar chu Thawhlehni khan Rural Development minister Lalruatkima’n a hawng.
Minister chuan Bungtlang ‘S’-a BDO office -cum- Block Panchayat Bhavan building leh tur RD Rest House chu uluk taka enkawl turin thawktute leh khawtlang mipui a chah a. BDO office chu mipuiin an harsatna an thlen a, sut kiansak an nihna hmun tur a ni, tiin, thingtlang khaw hrang hrang atanga pantute hawihhawm taka lo dawnsawn a, lo tanpui chu thawktute mawhphurhna a ni tih a sawi. RD department hnuaia scheme hrang hranga sum lokalte chu tangkai taka hmang tur leh thawhrimna leh taimakna nena hlawhtlinpui tum turin hamthatna dawngtu beneficiary-te a chah a ni.
RD minister a nih hnuah kum 4 chhungin MGNREGS-ah ni 100 inhlawhna an siam zat zat thei tih Lalruatkima hian a sawi a. Kumin kum tharah pawh ni 100 inhlawhna siam leh turin ruahman a nih thu leh kum 5 chhungin ‘Ni 100 inhlawhna’ tih hming putu MGNREGS chu a hming ang ngeia dik taka kalpui theih a ni tur chu lawmawm a tih thu a sawi.
Bungtlang ‘S’ BDO office building hi MGNREGS leh MzSRLM convergence atanga cheng nuai 172.94 senga sak a ni a. 2022 July 11 ah hna tanin kumin April 20 khan thawh zawh a ni. Chhawng li a ni a; canteen, chowkidar quarters, officer leh staff office room bakah a chhawng chung berah Conference Hall a awm a ni.
RD Rest House hi MGNREGS material component atangin cheng nuai 8 sengin building ruhrel awmsa cheithat a ni a. pindan panga – VIP room 1, semi-VIP room 1 leh ordinary room 3 a awm a; ordinary room-ah hian khum 3 theuh dah niin, a vaiin khum 11 a awm. Official-te, VC-te leh khualzin a mamawh apiang tan thlen theih a ni.
Bungtlang ‘S’ ah BDO office leh RD Rest House siam thar
