Bungzung PHC building hawng
NABARD sum hmanga sak, Bungzung leh Farkawn Primary Health Centre building thar chu Zirtawpni khan Health minister Dr R Lalthangliana’n a hawng.
Minister chuan din a nih atanga a vawikhatna atan Sesih PHC-ah doctor dah a nih thu leh mumal taka kalpui a nih thu sawiin, hun reiloteah Sesih PHC building pawh sak tum a nih thu te, Khawbung PHC pawh sakthat tum a nih thu a sawi a. Hriselna chu hmasawnna tura pawimawh leh kawngro su a nih vangin ngaihpawimawh zual a ni tih a sawi.
National Health Mission mission director Dr Eric Zomawia sawi danin, Niti Ayog health assessment-ah small state zinga titha berah Mizoram chu kum 4 chhung thlan a ni tawh a, nausen kum khat hnuailam thi tlem berna state-ah a zawnin kum hnih chhung thlan a ni tawh. Health Sub Centre 379 zinga 305 chu Health & Wellness Centre-ah hlankai a ni tawh a. Hengte hmang hian natna inkaichhawn theih loh Non Communicable Diseases – thisen sang, zunthlum, cancer leh a dangte’n nghawng thalo zawk a thlen loh na’na hmalakna zau zawk kalpui tum a ni.
Bungzung PHC building thar hi NABARD (RIDF-XXVI) 2020- 2021 sum, nuai 268.99 senga sak niin, contractor hi Ngurzamlova Kolasib a ni. Hna hi 2021 December 13-a tan niin, kumin June 13-a zawh hman tura tih a ni a, April 24-a zawh a ni a, work component 5 kentel a nei a ni. Zopa chhiara chhawng hnih a ni.
NABARD (RIDF-XXV) atanga sak tho Farkawn PHC building ah hian cheng nuai 246.94 sen a ni a, contractor chu Excell Consultancy Services Aizawl a ni. Hna hi 2020 September 8-ah tan niin, kumin April 25-a zawh a ni. RCC framed structure a ni a, Zopa chhiara chhawng khat a ni.
Bungzung PHC building hawng
