Mizoram kaltlanga Burma ram, Rakhine State lama dan loa tuialhthei phurhluh thin chuan nghawng a nei na tial tial a. Phurhluh tur dangtu Young Lai Association laka lungawiloin filling station neituten hma la turin thuneitute an ngen mek.Thudawn danin, tunhnaia Burma tualchhung buaina a nasat hnu ah Mizoram atanga Burma-a black market-a petrol leh diesel phurhluh hi a nasa lehzual a, heng tuialhthei phurhluh tam ber hi Mizoram/ India ramri bul, Lawngtlai leh Siaha district depa awm Rakhine State-ah a lut nia sawi a ni.
Rakhine State hi Arakan mi tamna a ni a, anmahni hel pawl Arakan Army chu tunhnaiah Burma-a sawrkar sipai dotu Chin sipaite nen an intibuai fo nia sawi a ni bawk.
Hetiang boruak karah hian Lawngtlai district-a tlawmngai pawl lian ber – Central Young Lai Association chuan Mizoram/ Lawngtlai chan tur petrol leh diesel tam tak Burma lama dan loa lakluh a nih avang hian, tuialhthei hman tulnaah an district mipui leh hmasawnna hna thawktu company/ contractor lamin duhkhawp an hmu lo fo tih an sawi bakah Burma-a Chin unaute beitu Arakan Army thuhnuaiah tuialhthei lakluh tam zawk hi a luh avangin, kumin June 24 atang khan duty insiamin tuialhthei lakluh thin hi an dang a ni.
July 2 zing dar 8.30 vel pawh khan Lawngtlai district Bualpui ‘Ng’ ah YLA leh police duty-te chuan pik up truck 6 hmanga Siaha district-a phurhluh tur diesel barrel 57 (litre 12312) an man a. Pik up khalhtute hian Burma ramri, Siaha district-a Lungpuk (Lopu) kalpui tur niin an sawi a, Aizawl atanga an phurh niin an sawi.
Hetihlai hian Siaha District Pump Owner chuan thuchhuah siamin, an district ta tur oil phur tanker-te chu June 30 tlai atang khan Central YLA-in Lawngtlai khawdaiah kaltlang phal loa an hrenbeh sak vangin July 2 zing dar 8 atang khan Siaha district-a petrol pump-te chu tiamchin awm loa an khar dawn tih an sawi a. Hemi ang hian Thawhlehni khan an district-a filling station chu khar a ni.
All Mizoram Petroleum Dealer’s Association (AMPEDA) pawhin thuchhuah siamin, tunhnaia Saiha district-a kal tur tank lorry Lawngtlai bula dan a ni chu tha an ti loa, hetianga mipui mamawh (essential commodities) / explosive phurte kawng laka dan hi a him loin, thuneituten a ranglama hma laksak a, an petrol pump thleng him taka thlensak turin an ngen tih a sawi a ni.
CYLA general secretary Joseph Lalhmingthanga chuan, sawrkar phal loh leh chhimlam district pathuma DC leh DCSO ten khapna thuchhuah an neih hnu ah pawh tun thlengin Siaha district-ah black market-in Burma ah petrol leh diesel thawnluh a la tawp loa, explosive license neiloin mimalin barrel-in diesel leh petrol an phur thin a, hei hi tha lo an tih em avangin an thiam dan angin hma an la mai tih a sawi. Chin unaute beih thintute tha tihchakna tur hmanrua thawnluh hi an duh lo a, he thilah hian Mizoram sawrkar leh mipui kan tanrual lai a, a do zawnga hma la tlemte an awm chu pawi an tih thu a sawi a ni.
Sawrkarin tha leh khauh taka hma a lak theih chuan CYLA chu he thilah hian inrawlh a tulna an hriat loh thu a sawi bawk.
CYLA thuchhuak:
Burma-a dan loa oil phurh luh avangin Mizoramah harsatna tam tak an tawk a. District hrang hranga thuneitute pawhin Burma-a oil phurh luh tur dan loa pekchhuah/ hralh an khap nual tawh a. Lawngtlai district bikah district thuneitute nen sawihoin, a bawhzui kawngah sawrkar kan thawhpui zel dawn.
* Siaha district tana oil phur tanker-te hi dang loin an vaia kaltlang tir vek an ni thin a. Tunhnaiah Siaha district-a filling station neitute hminga tanker rawn kal, mahse Siaha pawh luhtir loa Burma lama dan loa kaltir nghal an awm fo a; Siaha district-a oil tanker lut si, mipui chan ve phak loha filling station kawngbo, pump awm lohna Burma ramri hnaiha phurh a ni fo hi sawrkar thuchhuak ngaihpawimawh lohna, ram mipui hrekna leh zah lohna lian tak, mipui chanai pawh mimal hamthatna atana lak duhna thinlung tha lo tak niin kan hria.
* Tunhnaia Burma rama bungraw phurhluh avanga hlawkna tel tam tak an awm hi, Mizoram sum leh pai dinhmun atanga thlir chuan thil lawmawm tak a nih rualin, mipui nawlpuiin kan tawrh phahna (oil lak tur awm mumal lo adt) a tam avang leh, sum leh paia hlawkna kan duh lutuk avanga ram mipui thawhhona leh inlungrualna tinghing khawpa awm hi thil tha lo tak niin kan ngai.
* Mipui, a bikin Lawngtlai leh Siaha district mipui harsatna siam zawnga awmte dodal kawngah leh sawrkar tha tichak tura tha thawh kawngah CYLA chuan theihtawp chhuah zel a tum a. Chutihlaiin Siaha district mipui mamawh, a bikin oil vanga harsatna an tawh hi kan phal loa, mipui chanai Burma lama tanker chawpa kaltir a, a black-a zawrh hi kan thlir zui zel dawn.