Uttarakhand-a Almora district huamchhungah bus pakhat chu thawhtanni khan chesualin, kawngthlangah thui tak a lum a, mi 23 in nunna chanin, mi 15 in hliam na tak an tuar.
Almora district disaster management officer Vineet Pal chuan he bus ah hian mi 40 an chuan thu sawiin, a chuang zinga 22 chu a hmunah hian boral nghalin, pakhat chu Ramnagar damdawi in panpui a nih laiin a boral a ti.
Bus hi Pauri atanga Ramnagar pan a kal niin, Marchula-ah a chesual a, kawngthlang lam meter 200 vela thui a lum niin thuneitute chuan an sawi.
Uttarakhand chief minister Pushkar Singh Dhami chuan chetsualna thleng chu pawi a tih thu sawiin, nunna chan tam tak an awm chu pawi a tih thu a sawi a, hliam tuarte pawh enkawlna tha tak pek nghal an nih thu a sawi bakah, chhanchhuah hna thawk turin Police, SDRF leh NDRF te chu a hmunah tirh nghal an nih thu a sawi bawk.
Chief minister chuan chhanchhuah hna thawktute chuan a tul ang zelin beihpui an thlak nghal thu sawiin, hliam tuarte pawh enkawlna tha tak an pek nghal zel thu leh na zual an awm a nih chuan thlawhna hmanga hmunpui lam pantir nghal zel tura hriattir an nih thu a sawi zui.
Bus chesual vangin mi 20 chuang boral
