Cachar-ah Bangladesh ramri-ah zan curfew puang

Cachar-ah Bangladesh ramri-ah zan curfew puang
Assam-a Cachar district thuneitute chuan Thawhlehni khan Indo-Bangla ramri hrulah zan lamah curfew puangin chet velna pawh khuahkhirh lehzual a ni tih an puang.
“He thupek hi dan lova chete chetna tam leh ramri kâna phal loh thil leh ran tawlh thin venna atana tih a ni,” tiin District Commissioner Mridul Yadav-a’n thupek a chhuahah tar lan a ni.
Yadav-a hian Bharatiya Nagarik Suraksha Sanhita (BNSS) Section 163-in phalna a pek angin hetiang hi a ti tih a sawi a. Inkhuahkhirhna hi thla hnih chhung atana tih a ni tih a tar lang bawk.
District thuneitu dangte chuan khuahkhirhna thar siam a tul chhan hi an sawi zui lo.
Khuahkhirhna ang chuan ni tlak atanga a chhuah leh thlengin Cachar district huam chin, Indo-Bangladesh ramri atanga km khat huamah pawn chhuah khap a ni a. Hei hi dan lova ramri kâna chet velna tihtlemna tur leh hetiang ti thin chet hun laia venhimna khauh zawk kalpui theih nana tih a ni.
Hei bakah hian Cachar district china Surma lui leh a pengah zanah chet chhuah khap a ni a. Katigorah Circle Officer hnen atanga phalna nei chauh lo chu Surma-a sangha man phal a ni lo vawk a. Phalna nei pawhin an lehkha chu District Magistrate leh 170th Battalion BSF, Dholcherra Commandant hnenah an thehluh a ngai.
District thuneitute chuan an huam chhunga ramri atanga km nga chinah zanah chini, buhfai, buhtun, tel leh chi reng reng eng hmanraw hmang pawha ken an remti lo bawk.
Katigorah Circle Officer-in a tul zual bik chu phalna a pe thei a. Phalna lehkha hi district magistrate leh 170th Battalion BSF commandant hnenah an thehlut tur a ni bawk.
Cachar Superintendent of Police (SP) Numal Mahatta chuan zanah ramri hrulah patrol a ni dawn tih a sawi ve bawk a. “Cachar Police leh BSF tanghote chu Indo-Bangla ramriah venhim hna leh muanna a awm theih nan an patrol dawn a ni,” a ti.