Chakma Autonomous District Council 11-naah sawrkar thar a piang dawn a. Nilaini khan chief executive member atan Nirupam Chakma lakluh a ni.
Chawngte-a CADC Art & Cultural Hall-a CADC executive secretary Pronit Bikash Chakma kaihhruai lakluh inkhawmah Lawngtlai district bawrhsap Donny Lalruatsanga chuan rinawmna thutiam lak tirin Nirupam Chakma hi a lalut a. CEM chuan, CADC-a sawrkar mumal leh ngelnghet tak awm tura hmalatu – larsap, chief minister, District Council & Minority Affairs minister leh Chakma Democratic Alliance Legislature Party chungah lawmthu a sawi a. CADC-ah huapzo, langtlang leh mipui sawrkar din tura hma lak a ni dawn tih a sawi
Hmasawnna kawng hrang hrang – zirna, kawlphetha, kawngpui tha, thalaite tana hna thar siam leh a dangte ngaihpawimawh a ni dawn a, CADC hmasawnna atan a kaihhruai sawrkarin theihtawp a chhuah dawn tih a tiam. Hemi kawngah hian thahnemngai taka sawrkar tawiawm turin CADC huamchhunga village council, tlawmngai pawl, kohhran leh mipui a sawm tih a sawi a ni.
Lakluh inkhawm hmanpuitu DC&MA minister pawhin, CADC chu chu mahnia ro inrel thei loin kum khat zet Governor’s rule-a a awm a, vawiinah sawrkar a ding leh thei ta hi CADC mipui a lawmpui tih a sawi a. Autonomous District Council pathum kan neihah sawrkar ngelnghet kan nei hleithei lo fo tih sawiin, he thil hi ngaihtuahna fim leh thiang tak senga an tihtawp a tul hle a, kal dan pangngaia an kal reng chuan Council-in hma a sawn thei dawn lo tih a sawi.
Mizoram sawrkarin ADC-te hmasawnna atan ngaihtuahna a seng a, chief minister-in CADC budget pawh kum 2023- 2024 a cheng nuai 14181.45 ni kha kumin 2026- 2027 BE ah chuan nuai 16939.80 a kai a, a punna nuai 2758.35 a ni tih a sawi.
“Kawng hrang hranga kan thatna tura sawrkarin hma a lak mek lai hian, District Council pawhin tih tur leh mawhphurhna kan nei tih hria ila; hna lak chungchangah kan chin dan tha lo bansan ngam a ngai. Budget-a sum awm dan ngaihtuah miah loa politics khelhna angrenga thawktu lak vak vak, election campaign-na atana hna intawktarh te hi thleng tawh lo se, kan mamawh ngei chauh dik tak leh fel taka lak a hun tawh hle,” a ti.
CADC sawrkar thar atan CEM lalut
