Chakma Autonomous District Council (CADC)
hruaitu tam zawkte’n ZPM an zawm dawn emaw tih laiin an ko an thlak thut a, Tuichawng biala MNF candidate tur pawh a nghawng nghal.
CADC-a an CEM (Chief Executive Member) RM Chakma chu Tuichawng bialah inthlanpui lo awm turah MNF candidate a nih dawn loh avangin amah zuitu MDC 16 vel nen ZPM-ah an lut dawnah ngaih a ni a, mahse Thawhtanni tlaiah khan an ko thlakin, MNF nih zui an tum.
RM Chakma hi Tuichawng bialah MNF candidate a ni dawn tih thu dawn a ni a, Thawhlehni khan Aizawl a pan nghal. Nilaini-ah MNF-in inthlanpui lo awm tura an party candidate tur puan an tum a, chumia tel tura Aizawl pan nghalah ngaih a ni.
MNF hian Tuichawng biala ding tur hian DD Chakma an tifel tawh a, ani hi RM Chakma nena inchuh an ni. Chutiang boruakah chuan ‘seat’ chang lo tura ngaih RM Chakma leh amah zuitute chu party atanga chhuah an tum ta a ni.
RM Chakma leh amah zuitute hi ZPM-a lut tura ngaih an ni a, ZPM lam pawhin October ni 4-a lawmluh an tum. Anmahni lawmluhna hun hmang tur hian Aizawl atangin Thawhtanni khan ZPM hruaitute an thawk chhuak hman a, Lunglei an thlenin RM Chakma te hian an rilru an thlak tih an hria a, a tukah Aizawl an pan leh tih thu dawn a ni.
RM Chakma leh amah zuitute hi ZPM-ah an lut ang a, CADC-ah pawh ZPM sorkar a ding dawn nia ngaih a ni a, mahse Thawhtanni tlaiah khan RM Chakma hi chief minister nen inbiain, chumi hnuah chuan an ko an thlak ta a ni.
RM Chakma hi Tuichawng biala MNF candidate a ni dawn tih a chiang tih thu dawn a ni a, chutih rual chuan candidate tura lo tihfel tawh DD Chakma te lam an lawm lo turah ngaih a ni ve thung.
CADC sorkar hruaitute’n an ko an thlak
