Chakma Autonomous District Council sum hmansualnaah chief executive member leh executive member hlui 8 chu court-in thiam loh a chantir a, vawiin – December 20 hian hrem dan tur tihchhuah a ni ang.
Prevention of Corruption Act Court special judge thutlukna siam danin, kum 2018 chhoa CADC CEM Shanti Jiban Chakma bakah executive member – Hiranand Tongchangya, Sanjeev Chakma, Kusum Lota Chakma, Onish Moy Chakma, Buban Kumar Chakma, Mohan Chakma leh Anil Kanti Chakma te chu hetihlaia CADC chairman Budha Lila Chakma hnenah a sum dawn tur bak aia tam pek kawnga mawhphurtua puh an nihnaah mawh an phur ngei nia hmu in thiam loh a chantir a ni.
Kum 2003 khan Budha Lila Chakma hi independent-in CADC inthlanah Vaiseitlang MDC bial atanga thlantlin a ni a, sawrkarna siam tumnaah party behchhan neia a inleh avangin hetih laia CADC chairman Gokul Chandra Chakma chuan a ‘disqualify’ a ni.
Ban a nih dana lungawiloin Budha Lila Chakma hi Gauhati High Court-ah a zualko a, kum 2008 khan High Court hian thutlukna siamin, MDC atanga an paihna chu a hnawlsak a, dan anga MDC-a a hlawh leh hamthatna kum 5 kalta chhunga a dawn turte chu pe turin thupek a siam a ni.
Hemi ang hian ban a nih chhunga hlawh leh thildanga a dawn tur hi Rs. 14,03,494 chu kum 2008 hi pek tan a ni a, installment hniha pek a nih hnu ah pawh pek zawh a la ni lo.
Kum 2018 a CADC sawrkarah amah Budha Lila Chakma hi MDC-a thlan leh niin, chairman a ni a. Hetihlai hian a sum dawn tur la pek tlak loh bakah ban a nih kaihhnawiha zangnadawmna a dil cheng nuai 71 pe turin CADC sawrkar hi a ti a. Hemi zulzui hian, dan tlawhchhan tha awm lo leh a hmaa sum a dawn tawh zat chhutfel loin Rs. 63,34,914 pek hman a ni.
MNF District Hqrs. Chawngte hotute chuan mipui sum tur hman dik loh a awm nia hria in Anti Corruption Bureau-ah FIR an thehlut a, hemi bawhzuina kalzelah court hian dan loa sum hmanah hian a mawhphurtute hi thiam loh a chantir a, a hming tumtu ber Budha Lila Chakma erawh kumin October 10 khan a thih avangin a case hi tihtawp a ni.
CADC sum hmansualnaah ex CEM/EM te hrem dawn
