Nilaini khan Session-ah DC&MA minister R Lalzirliana’n Chakma Autonomous District Council (CADC) thuneihna chu larsap kutah a awm tih House a hriattir.
District Council & Minority Affairs (DC&MA) minister hian House-ah DC&MA notification a pharh a, chutah chuan India danpui-in thuneihna a pek angin, CADC thuneihna chu larsap kutah a awm thu leh larsap hian Lawngtlai bawrhsap chu CADC lo enkawla caretaker ni turin a ruat tih te ziahlan a ni.
Notification-a a lan danin, nikum November ni 17 khan CADC Chief Executive Member (CEM) Buddha Lila Chakma a bang a, Rasik Mohan Chakma chuan sorkarna siam thei a inti a ni. Chutianga politics thli tleh vel chu CADC leh a huam chhung mipuite tan a tha lo tih chu larsap ngaihdan a ni.
Chutiang karah chuan recruitment rules tel lova hna lak leh thil dik lo a thleng nasa a, chuvang chuan larsap hian CADC sorkar chu mahnia kal thei lovah ngaiin, thla ruk chhung atan caretaker a ruat ta a ni tiin notification-ah hian ziah a ni.
CADC thuneihna larsap kuta dah a nih thu sawi
![](https://theaizawlpost.org/wp-content/uploads/tap_logo-min-large.jpg)