November 7-a Mizorama MLA inthlanpui neih turah November 5 tlai dar 4.00 khan campaign theih hun a tawp a. Chief electoral office bakah district election officer tinten mipui, candidate leh political party te zawm tur an tichhuak.
Inthlan felfai leh thianghlim a awmna tur leh Election Commission of India (ECI) in inkaihhruaina a siamte zawm a nih theihna’n vote thlak tawp hun atanga chhiarleta darkar 48 chhung (i.e. 5.11.2023 tlai dar 4.00 atanga 7.11.2023 tlai dar 4.00 thleng) chu ‘silent period’ a ni a. Hemi hun chhung hian political campaign rawng kai reng reng neih phal a ni tawh lo.
Model code of conduct leh inthlan kaihhnawih dan siamte chu candidate, political party leh sawrkar hnuaia awm zawng zawngten tha taka an zawm chhunzawm zel a beisei tih CEO Mizoram chuan a sawi a. Hremna dan lekkawh ngai kher loa mahni inthunun (self-regulate) theuh turin a ngen.
Hemi hun chhung pawh hian Flying Squad, Static Surveillance Team adt. dan bawhchhiatna a awm leh awm loh an fangkual reng dawn a; media leh social media pawh ngun takin an vil reng dawn tih election hotute chuan an sawi a ni.
Political party leh candidate te zawm tur siam a ni:
4Political party leh candidate te tan campaign phal a ni tawh lo.
4Khawi hmunah mah mi 5 aia tam punkhawm emaw inhawrkhawm phal a ni lo.
4Constituency pawn atanga campaign tura kal, chu constituency-a vote nei si lote chu constituency an chhuahsan tawh tur a ni a. Hei hian candidate leh election agent te leh party office bearers, state in-charge a ruat te erawh a huam ve lo.
4Aurinna (loudspeaker) hman phal a ni tawh loa. District magistrate-in khapna thupek Sec. 144 CrPC hmanga a chhuah chu zawm vek tur a ni.
4Sec. 1264 of the Representation of the People Act 1951 sawi angin, electronic media/ social media leh a tlukpui dangteah inthlan kaihhnawih, mipui rilru sukthlek tidanglam thei thil tarlan/ chhuah phal a ni lo. Hemi chhung hian mipui ngaihdan lakna – opinion poll siam leh exit poll (vote thlak zote kawmna/ zirbingna atanga inthlan result rinlawk) tih loh tur a ni. Hei hian vote thlak tan hun atanga a zawh hnu darkar chanve thleng a huam a ni.
4Inthlan ni – November 7 leh a hma ni – November 6-a print media-a political advertisement chhuah turte chuan MCMC (Media Certification and Monitoring Committee) phalna an la tur a ni.
4Section 130 of the RP Act 1951 sawi angin, inthlan ni ah polling station atanga metre 100 huamchhungah vote dilna anga ngaih thei thil reng reng tih phal a ni lo.