Canadian ram kang khuin New York boruak tichhia
Canada rama ram kang khu avangin US-a New York leh a chhehvel boruak chhiain hemi atana himna tura inkaihhruaina tihchhuah a ni.
New York state Department of Environmental Conservation (DEC) leh Department of Health (DOH) chuan Long Island, New York City Metro, Lower Hudson Valley, Upper Hudson Valley leh Adirondacks tan inkaihhruaina hi Inrinni (India-a Pathianni) khan X-ah a tichhuak.
Thuneitute chuan heng hmunah hian boruak chu ‘mi derdep deuhte tan a hrisel lo’ tih an sawi.
Canada-a ram kang avang hian mi sang telin an chenna chhuahsanin a khu hian ramri a pel tawh a, United States hmar lam boruak a tihim lo hle.
Air quality index (AQI) chu Inrinni khan New York state-ah chuan 100 chung lam niin hmun thenkhatah chuan 135 a kai a. Inrinna hi New England-ah pawh puan a ni.
AQI hian boruaka bawlhhlawh awm zat a teh thin a, hriselna atana hlauhawm chin tihchianna a ni a. A zat a san hian thawk luh atan a him lo tihna a ni.
Tun hi Canadian ram kang avanga US-a boruak him lo laka inrinna puan vawi khatna a ni lo va. July thla laihawl vel khan Chicago-ah nausen leh upate tan puan a lo ni tawh.
Washington atang hian an thenawm rama politics-a inrawlhna pawh a awm phah a. July thla tiur khan US Congress member paruk chuan Canadian palai hnenah an ram atanga mei khu lut avangin American-ten nipui an hman tur nuamin an hman loh phah tih an thawn.
Canada-ah hian ram kang 550 chuang a awm mek a, a tam ber hi Manitoba province-ah niin hectare maktaduai 6.1 chuang nikum khan a kang.
May leh June khan Canada khawthlang lam kang vakin Saskatchewan leh Manitoba province-a cheng mi 30,000 vel an insaseng a, emergency puan a ni.
Canadian ram kang khuin New York boruak tichhia
