Cancer inthlahchhawn a ven theih em?
Mithiamte chuan cancer hi genetic mutations vangin a awm thei niin an sawi a, i chhungkhat laina hnai te zingah cancer an awm phei chuan a risk a sang lehzual thei niin an sawi bawk. Cancer hi abnormal gene, thlahtute thisen atanga kan kai atangin neih theih a ni a, hetiang case-ah hi chuan cancer chu inthlah chhawn ni lovin, cancer thlen thei abnormal gene zawk chu kan inthlahchhawn chu a ni a, chu abnormal gene chuan cancer a thlen ngei ngei dawn tihna erawh a ni lo va, a thlen thei tihna a ni.
Max Super Speciality Hospital a Oncology Daycare Centre a senior director Dr. Pramod Kumar Julka chuan cancer inthlahchhawn chungchanga hriat tur pawimawh ni a sawi, Times of India health section-in an tarlan te kan rawn chhuah chhawng e. (Hetih rual hian cancer risk tisang theitu chi hrang hrang a awm tih tih erawh hriat tel a pawimawh, entirnan kan ei leh in leh kan nitin khawsak phung bakah kan taksa kan sawizawi dan thlengin cancer risk tisang thei a ni.)
Mithiamte chuan cancer inthlahchhawn theih hi chi hrang hrang a awm niin an sawi a, chung zingah chuan hnute cancer, prostrate cancer, ovarian cancer, colorectal cancer te hi a langsar zual deuh te niin an sawi.
Cancer siamthei gene inthlahchhawn theih te hi cancer susceptibility gene emaw inherited cancer gene emaw an ti mai thin.
Nu te lam emaw pa te lam emawah cancer pahnih emaw a aia tam emaw an awm chuan ‘strong family history of cancer’ ti a sawi theih an ni a, hei bakah hian an cancer dan chu a inan lehzel emaw, cancer siamtu gene fault chu a thuhmun chuan an chhungkaw member dang zingah cancer risk a sang lehzual tihna a ni a, chung cancer neite chuan kum 50 an tlin hmain cancer chu an nei a nih chuan an a risk a sang lehzual tihna a ni bawk.
Chutianga chhungkuaah cancer chu inthlahchhawn ang deuha ngaih theih kan nih chuan regular taka in-check-up a pawimawh niin Dr Julka chuan a sawi a, hei hian cancer chu a stage a hniam lai a hriatchhuah a, enkawlna dawn hmaa dam lehna chance a tisang niin a sawi. Chhungkuaah cancer inthlahchhawng risk sang kan nih chuan kan taksa hriselna a zirin thla ruk dana in-entir a tha niin Dr Julka chuan a sawi a, cancer chu kum lama naupang deuh pawhin neih theih a ni. Dr Julka chuan hetiang chhungkaw member dan chuan kum 20 tlin tawh chuan mahni tawka hnute exam fo a pawimawh niin a sawi a, kum 30 tlin hnuah clinical examination neih fo a pawimawh tawh a, kum 40 ral kai tawh phei chuan mammography test neih ngei tur niin a sawi bawk.
BRCA mutations: BRCA 1 leh BRCA 2 te hi mihring gene a ni a, tumor-sipressing protein siamtu a ni. Heng gene-ah hian mutation a awm chuan, tumor insiam tur vengtu tur protein an siam tur an siam thei ta thin lo a ni. BRCA1 leh BRCA2 inherited mutation te hian hnute cancer leh ovarian cancer risk a tisang a, prostrate cancer, pancreatic cancer, peritoneal cancer leh fallopian tube cancer te pawh BRCA mutation nena inzawmna nei niin an sawi bawk.
Dr Julka chuan, “Hetiang a nih avang hian hmeichhe thenkhat, cancer inthlahchhawng chhungkua, an tana cancer risk sang te chuan hnute emaw ovary emaw lo paih lâwk te pawh an duh thin a, hei hian cancer chu a veng thei a, mahse, 100% guaranteed treatment erawh a ni lo. In chhungkuaah cancer chu inthlahchhawn theih a nih chuan BRCA mutation chance a awm a, chuvangin a hma lama doctor rawn a tha ber,” a ti.
Dr. Julka chuan hetianga cancer inthlahchhawn theihna risk a awm te tan exercise regular taka lak a, awm âwl pumpelh a, thil al leh junk food ei loh a, taksa rihna tihhniam a pawimawh niin a sawi a, “Heng nungphung tlema kan thlak danglam hian cancer risk a tihniam ve thei a ni,” a ti bawk.
Cancer inthlahchhawn a ven theih em?
![](https://theaizawlpost.org/wp-content/uploads/tap_logo-min-large.jpg)