Tun tum Lok Sabha inthlanpui kan hmachhawn mekah, MP atana candidate zinga pakhat Pu K. Vanlalvena chuan a campaign-naah, vote nei zawng zawngte chu inthlannaah vote thlak theuh turin a sawm a, “Min vote lo tur pawhin vote i thlak vek ang u; democracy ram kan nih angin chu chu a hlu hle a ni,” tiin mipui a sawm a.
MP candidate hian democracy ram hlutzia a hrechiang a, democracy ramah mipui vote hlutzia pawh a hrechiang hle; chutih laiin vote neitu mipuite hian kan vote hlutzia hi kan hrechiang lo ang tih a hlauhawm hle a ni.
Sawrkar danah, vote nei thei chin chu, mahni chhia leh tha hriatna hmang thiam tur khawpa rilru fim chin, mi puitling tia chhiar theih kum 18 chin a ni. Kum 18 kan tlin tawh chuan voter ID neih kan duh vek a, nei ngei turin tihtur tul zawng zawng kan hlenchhuak a, vote nei thei turin tihtur leh zawm tur hrang hrang a awm a, chungte chu kan hlenchhuak vek thin.
Vote kan han nei ve ta cheng a, vote nei tura kan beih nasat thin tehlul nen, vote kan neih chhan ber ‘inthlan’ hun a lo thleng a, vote thlak tum leh reng reng si lo hi kan tam thin hle. A bikin MP inthlanah hian MLA inthlan aiin vote a tla tlem ziah a, a chang chuan MLA inthlan aia 20% -a a tlak tlem zawk tum pawh a awm.
Voter ID (EPIC) hi khua leh tui proof-na document emaw, thil engemaw tih dawna document thil tel ngai ang chauha lekchhuah tur emaw tihna hi a lian ta hle. Inthlan nia EPIC lek chhuak duh si lo, inthlan loh nia leklam uar leh hle si hi thil dik lo tak a ni. Mipuite pawh inngaihtuah harh ila, Vote ka neih chhan ber inthlan niah hian ka vote neih hi ka hmang ngei tur a ni tia rilru siamin, Pu K. Vena’n mipui a sawm ang hian, tum dang zawng aia vote tla tha turin vote nei chin chuan vote i thlak theuh ang u.
Candidate-in ‘vote thlak’ a campaign
