Site icon The Aizawl Post

Candidate siam ve lo mai turin chah

MNF sawrkar chu Lunglei Municipal Council inthlan hun puang chiang thuai tur leh inthlan hi a hmachhawn ngam lo a nih chuan candidate siam ve lo mai turin an chah tih Congress Thalai chuan an sawi.

Lunglei District Youth Congress Committee (LDYCC) thuchhuak chuan Lunglei ami ngei, MNF sawrkar hnuaia MLA – Cabinet minister Pu C Lalrinsanga, High Powered Committee vice chairman Pu Lawmawma Tochhawng, Mizoram Youth Commission chairman Dr Vanlaltanpuia leh Bamboo Development Board vice chairman Dr K. Pachhunga ten nihna pawimawh tak tak kum 4 chuang an chelh chhung hian, an nihna chelhah an lungawiin an duhtawk hle am hmasawnna lam an ngaihthah hle thung tih a sawi a. MNF Gen. Hqrs hruaitute pawhin Lunglei district-a MLA an neihte dinhmun tha lo tak hi an hmuhchian em avangin LMC inthlan hun tur an puang ngam ngang lo niin a sawi.

Tunhnaia mipuiin nasa taka an nawr avang leh LMC inthlan a hnaih tawh avanga Lunglei khawpui chhung kawngpui chhe lutuk tawh, run dal chauha sawrkarin a siamthat chu a chhiat leh hma ngeia LMC inthlan hun puang turin MNF sawrkar a phut tih sawiin, ‘Lungleia MLA an neihte pawh hian MNF party-in LMC inthlan turah hian candidate an nei ngam dawn leh dawn loh an hotute hrilhchiang thuai turin kan phut a ni,’ a ti.

LMC inthlan a nih tur thu kum kalta lama an puang daih tawh chungin, tlanchhe pahin ruahmanna siamah MNF hi puhin, ‘Congress sawrkar kalta kum 10 chhunga Lunglei district hmasawnna leh MNF sawrkar kum 4 chuang hret kan hrawn chhunga kan hnungtawlhna thlir hian, kumin kumtawpa MLA inthlan hmachhawn pawh kan chak zual phah hle. Lunglei district hmasawnna kalpui leh tur hian Congress party chu kan inpeih tawh takzet a ni,’ LDYCC chuan a ti a. LMC inthlanah ward awm zawng zawng Congress party-in a la vek dawn tih a sawi bawk.

Exit mobile version