Car chhuak thar thenkhata a chung khuhna (sun roof) hawnga lirthei tlan laia naupang dak chhuak thin chu chetsual palh thila a him loh avangin lirthei khalhtu leh nu leh pa te an fate laka himna ngaihtuah turin Traffic Police chuan an chah.
Senior SP Traffic thuchhuak chuan, Traffic Police-ten an duty hmun atanga nitina an thil tawn leh hmuh thinah lirthei khalhtute fimkhur ngaihna nia an hriat leh zawm atana tha an tih sawiin, ‘Two wheeler, a bikin scooty khalhtu zingah hmeichhia kan pung nasa a. Nu in an fate paw chung leh two wheeler (private & commercial) ah bawr tak taka school naupang phur hmuh tur kan awm ta fo a; kan naupang phurh lai muthlu ta maite pawh hmuh tur an awm thin. Heng avang hian two wheeler khalhtuten anmahni leh an mi phurhte himna ngaihtuah reng thin turin kan ngen a ni,’ a ti.
Tunlai car chhuak thar thenkhatah a chung khuhna (sun roof) hawnga lirthei tlan laia naupang dak chhuak leh thu chhuak hmuh tur an awm ta fo tih sawi bawkin, ‘Tlangram kawng zim leh te, kawi tak taka lirthei khalh kan nih avangin hetianga naupang an thuchhuak leh dinglawr mai thin hi a him lo hle a. Nu leh paten kan tu leh fate himna ngaihtuaha hetianga chuantir lo turin kan inngen a ni,’ a ti.
Naupang himna ngaihthah taka lirthei khalh chu The Motor Vehicles (Driving) Regulations 2017 leh Section 177 of The MV (Amendment) Act 2019 hmanga hrem theih dan a awm tih Traffic SP hian a sawi a ni.
Car chunga dakchhuak thinte fimkhur turin hrilh
