Mahindra & Mahindra Financial Service Ltd (MMFSL) hnuaia car loan hmanga dik lo taka cheng vaibelchhe 150 chuang lakchhuahnaa inhnamhnawiha puh mi pali chu tunhnai khan a chhuitu Mizoram Police chuan an man belh.
Tarlan tawh angin, he thilah hian a tirah Mizoram Police chuan a bul tumtu ber, MMFSL Aizawl Branch-a area business manager Jakir Hussain bakah a thurualpui mi 10 an man tawh a. Lirthei pechuak tak tak si loa, loan pek thin a nih avangin Aizawla car & three wheeler dealer 5 chu he thilah hian inhnamhnawih ve nia hriat an nih angin heng dealer-te bank account hi police-te hian an ‘freeze’ sak a, an inhnamhnawih dan pawh chhui zui a ni.
Thudawn danin, May 13 khan MMFSL Aizawl Branch-a thawk pakhat chu man a nih hnu ah Rafael Nissan dealer George S Thoite, Salem Veng; Aidu Motors Renault dealer Madhurjya Sharmah, Salem Veng leh National Business Enterprise (TATA) dealer Paul Zothanpuia John, Khatla te chu thu zawhfiah turin police-te hian an la ve leh a ni.
Car loan lema imbumnaah police-in mi pali an la leh
