‘Car man to’ tih chungchang hi tunhma atang tawh khan, sawrkar thar a pian apiangin sawi zui laih hlawh tur hi a la awm deuh zel a tih theih awm e. Car man to leitute hi state pachhiatzia hrechiangtu hlei hlei an ni thin si a, a zia lo thin hle a ni.
Car man to hi state dangte chuan an lo nei thei a nih pawhin, an tih thik ve ang ziazanga ‘anni pawh..’ ti ve ngawt zel thei dinhmunah kan ding lo tih hi kan hriat nawn fo a ngai.
Sawrkar kal tawhte kalphung ‘a tha lo’ tia ‘kalphung thar’ tawktawrhtute an han sawrkar hian, mipuiin an lakah beisei an nei sang em em a, thikthu pawh a chhe hma bik lo thei lo. Chuti a nih avang chuan, sawrkar thar pawh, mipui zai ngai chunga a kal hram hram a pawimawh a. ‘Sawrkar hmasate pawhin an lo ti ve thin tho a’ tia inhnem liam mai hi hruaitute riliru tur a ni lovang. Kawng chhia kan buaipui luai luai laia car man to lo tih ve chhen te hi a mualphothlak a ni!
Mizo District Council a han din tirh phat pawh khan, term hmasa ber kum hnihna tawp lamah khan, ‘sawrkar ve lem motor pakhat pawh nei lova awm reng chu a ni thei lo’ tiin second hand jeep lei an rawt a. Hemi chungchang hi October ni 20, 1953 khan sawi ho a ni a. Pu R.Thanhlira khan, “Tuna kan dinhmun en chuan la neih rih loh lam hi a tha zawk lawm ni ka ti deuh”, tia sawi pahin, “Jeep kalna turin kawng pawh a la tha tawk rih si lo a.... tun hnu kawng that deuh hun atan khek zawk a tha ang. Intodelh hi kan tum tur a ni si a. Tuna Jeep kan neih chu necessity aiin luxury ni zawk mahin ka hria...” tiin a sawi a. Second hand jeep hi cheng sangnga man a ni a, a behbawmte nen estimate chu Rs 7,500 a ni. A tawpah an lei ve ta hram a; a hnu lamah Jeep hman dan chungchangin sawi zui a hlawh ve viau a ni awm e.
A mawi leh man to nge nge hi chu kan awt a ni tih a chiang reng mai, sawrkar hmasa lamah pawh khan a chiang. Inrenchem lam hi chu a tu sawrkar mah hian an la ti tak tak thei lo chu a ni ber e. District Council kan nih tan atang khan ‘intodelh’ chu ram hruaitute vei ber pakhat a ni tih a chiang; mahse, kum 50 ral tawh hnu pawh hian, ram ro thil (asset) tling lo zawk buaipuiin kan la phe kan la phe chu a ni ber e.
