Carabao Cup – Arsenal leh United out

Nilai zan khan English Carabao Cup last 16 khelh a ni a, champion tura rinkai zinga mi Arsenal leh Manchester United te last 16 paltlang zo lovin an tla. Arsenal hian London derby-ah West Ham an hneh lova, Manchester United chu Old Trafford-ah ngei Newcastle United lakah si thum faiin an tlawm ve thung.
English Premier League-ah tlawm nei lova kal tluang mek Arsenal hian London Stadium-ah West Ham United an hmachhawn a, London derby-ah an khel chhe hle. Inkhel tan atanga minute 16-na lekah Arsenal defender Ben White chuan an lamah a ti-goal a, Hammers hmahruaina goal a thunsak. Goal an chhuah hnuin insiamthat tum viau mah se Arsenal an insiamtha thei lova, si khat phur chungin chawlhlawk an hmang.
Chawlhlawk hnu lamah West Ham an khel tha chhunzawm a, goal an thun leh thuai. Second half tan atanga minute ngana lekah Mohammed Kudus chuan Aguerd siamsak atangin an goal hnihna a thun a, an hmahruaina a tizau. Si hniha hma an hruai hnuin West Ham an khel tha chhunzawm viau a, an mikhualte an ngam ta hle. Kudus goal thun atanga minute 10-na lekah Jarrod Bowen chuan an goal thumna thunin, an chakna a nem nghet.
London-a an elpui West Ham lakah si thum phur mah se Mikel Arteta team an insiamtha hlei thei lo. Gunners hian ball chang tam mah se game awmze an khelchhuak hleithei lo. Goal thun lovin an khel tluan dawn emaw tih hnu minute 90+6-ah captain Martin Ødegaard chuan goal thunin an si phurh a sut then a. An thangtlawm lutuk a chhanchhuak hram. Ødegaard goal thun hnuin goal dang a luh belh tawh lova, West Ham lakah tlawmin Arsenal chu quarter-final lut zo lovin an tla ta a ni.
Arsenal hnawtchhuaktu West Ham hian quarter-final-ah fiahna hautak an hmachhawn zui leh a ngai dawn a, Anfield-ah Liverpool an hmachhawn a ngai dawn. Carabao Cup atang hian EPL team lian Manchester City, Manchester United, Arsenal leh Tottenham te an tla tawh a. Liverpool an paltlang leh thei a nih chuan Hammers hian champion beiseina sang zawk an nei ngei ang.
Si thum fai bawkin United an tlawm
Pathianni zana an mikhual Manchester City lakah si thum faia tlawm tawh Manchester United chu nilai zana an mikhual Newcastle United lakah si thum fai bawkin an tlawm leh. United hian Old Trafford-a an khelh hnuhnung vawi hnihah goal an thun loh laiin goal ruk ngawt an chhuah thung a, hun thim, hun duhawm lo takin a tlakbuak mek.
Old Trafford-a Carabao Cup final remath-ah Newcastle in an khel tha viau a, United sawp awm renga mawiin an inlan. Newcastle tan hian minute 28-naah Miguel Almiron chuan Livramento siamsak atangin hmahruaina goal a thun. Mualneitu lakah goal thun hmasa zawka an tan vangin Magpies an phur viau a, an khel pawh a hmuhnawm zui viau bawk. Almiron goal thun hnu hian minute 36-naah Lewis Hall chuan an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah United an insiamtha thei chuang lova, an buai chhunzawm. United an buai laiin Newcastle an vannei tluang ve thung. Si hniha hmahruai tawh Newcastle tan hian minute 60-naah Joe Willock chuan an goal thumna a thun zui leh a, an hmahruaina a tizau. United hian an si phurh sut tum viau mah se hun tawp thlengin goal an thun thei lova, champion lai an nihna Carabao Cup atangin betchhuah an ni a, an puanthuah an tel zui ta a ni.
Newcastle United tan final-a an hneh loh United hneh hi a lawmawm satliah a ni ngawt lova, kum 1972 nu lamah Old Trafford-a an vawihnih chakna chauh a nih vangin a lawmawm dan a dang a, an chak hi a hlu em em. United hnehtu Newcastle hian Chelsea an hmachhawn zui leh dawn a, fiahna hautak an hmachhawn zui leh ang.
Manager Erik ten Hag hnuaiah United an buai zui zel a, inelna hrang hrangah beisei an phak thei tak tak lo. Newcastle hneh lova an mualpho leh tak vangin season thara inelna hrang hrang an hmachhawn vawi 15 atangin vawi riat ngawt an tlawm tawh a, hei hi 1962-63 hnu lamah an chet chhiat ber tum a ni. An chetchhiat tluan em vangin Erik ten Hag dinhmun a him lo sawt viaua ngaih a ni. Ten Hag hian ban a tawk thuai a nih pawhin thil mak a ni lo vang.