Caraboa Cup champion City

Patianni zan khan English Caraboa Cup 2026 final khelh a ni a, inkhel hmuhnawm takah Manchester City chuan 2-0 in Arsenal an hneh a, Pep Guardiola hnuaia a vawi nga nan an champion. Pep Guardiola hnuaiah City an ropui chhunzawm laiin Arsenal erawh chu trophy la lovin an awm chhunzawm ve zel thung. Trophy lak tum Arsenal in an nghah leh rih a ngai a, an nghak chhuak dawn em tih erawh a la chiang lo thung.
Wembley Stadium-a final-ah hian Arsenal chu champion tura rinkai zawk an ni a. 2020 hnu lamah trophy an nghakchhuak ve ngei turah ngaiin Gunners tantute pawh an phur viau. An phur ang ngeiin final-ah bul an tan tha a, inkhel tir lamah an khingpuite an nawr na nghal viau. Na tak an khingpuite nawrin hlauhawm pawh an siam nghal. Hlauhawm siam zawn bawk mah se goal erawh an thun mai thei bik lo.
Inkhel tir lamah bet deuh zawkah tang bawk mah se City an insiamtha thuai a, inkhel a rei telh telh a, an khel tha tulh tulh. Chawlhlawk hmain ball chang tam zawk an ni hman a, goal thun bik lo mah se chak theih inrinna sang zawk nen chawlhlawk an hmang.
Chawlhlawk hnu lamah inkhel a hmuhnawm zui viau a, final boruak sanga tawk ngung zawk leh tunhnaia trophy chawi ngun zawk City chu nghet tha takin an inlan a, an khingpuite aiin inrintawkna an nei sang zawk. Nghet tha taka an inlan laiin Arsenal erawh champion chakna an tuihal luat vangin chet harsa an ti ve thung a, an chiai deuh tlat bawk.
Inkhel hmuhnawm takah goal lut a awm thei loh reng hnuin goal kan hmu ta nge nge.Arsenal manager Mikel Arteta-a’n si nghak chetha tak David Raya aia a luhtir Kepa Arrizabalaga a chesual a, ho taka ball a man beh loh vangin Nico O’Reilly chuan minute 64-naah awlsam takin a pet goal a, hmahruaina goal a thun.
Goal thun hmasa zawk an nih vangin City an phur a, inrintawkna sang zawk nen an inlan. Hetihlai hian Arsenal erawh an chiai viau a, an buai ve thung. Arsenal buai zual laiin City in fuh zetin an nawr tlang leh a. Goal hmahruai thuntu Nico O’Reilly chuan minute 64-naah awlsam takin a tauh goal nawn leh a, an hmahruaina a tizau.
Nico O’Reilly goal thun hmangin Manchester City hian EPL-ah an chunga awm mek Arsenal chu 2-0 in an hneh a, English Carabao Cup-ah an champion zui ta a ni.