Ration card vara buhfai lak man chu sawrkarin tumsak tawh loa a man ngaia pekchhuah a, card vara sawrkar sum senral thin chu tihhniam an ngaihtuah tih Supply minister B Lalchhanzova chuan a sawi.Thuthar thehdarhtute zawhna chhangin Food Civil Supply & Consumer Affairs minister B Lalchhanzova chuan kumin December atan ration buhfaiah buaina tur a awm dawn lo a. Tunkar chhung hian mamawh zat thleng kim vek tura beisei niin, January thla ami tur an buaipui mek zawk tih a sawi.
National Food Security Act (NFSA) in a huam chin ration card eng leh a pawl (AAY leh PHH) bak, non-NFSA ration card var atan bik buhfai hi kg. ah Rs. 34.75 in an lei mek a, hei hi card var neitu mipuiah kg. ah Rs. 15-in an hralh leh a, August 2023-a report danin card var nei hi chhungkaw 112720 niin, a lunung chuan 472248 a ni. Sawrkarin ‘subsidise’ atana sum a sen ral hi thlatin cheng vaibelchhe 7.11 vel niin, kum khatah vbch. 85 dawn a ni tih a sawi.
Card var nei zingah ration buhfai mamawh ngawih ngawih lo leh innghat bur lo an tam avangin tih hniam ni ta se, a chanve – cheng vaibelchhe 40 vel tal pawh hum thei se, hei hi health care bill leh mipui mamawh tul dang atan sawrkarin a hmang tangkai thei dawn tihna a ni tih a sawi.
Card var nei zinga ration buhfai tel loa khawsak harsa zual tan card pawl nei (PHH) a thunluh dan zawn a ngai tih minister hian a sawi a. Tunah hian Mizoramin card pawl nei thei tura ‘quota’ a neih chu 3000 chuang hretin hnawhkhah ala ni lo hrim hrim a, hnawhkhah hnu ah quota dil belh pawh sawrkar laipuiin Mizoram sawrkar a lo sawi hmuh sa dan a ni bawk tih a sawi a ni.
Mizoram buh thar buhhum lei an tum a, hetiang lei hian Food Corporation of India atangin minimum support price pek theih dan a awm avangin Kolasib district-a buh thar, Silchar lama thawn thlak vek thin chu leiin an her anga, ration buhfai atan pekchhuah dan dap a ni dawn tih a sawi bawk.
Tunah Mizoram pumah buhfai stock quintal 28187.04 a awm a. Kudam hnawhkhah ngai hnawhkhahna tur quintal 9052 chu tunah hian pekchhuah mek a ni tih a sawi.
FCS&CA hotute sawi danin, card eng leh pawl tan chuan nakum May thlenga lakna tur ruahman fel a ni tawh a. Card var ho lak tur, open market-a lak thin erawh tuna quintal 50000 leina man (cheng vbch.17) an neih sa bak chu a la daih lo nasa hle a ni. Huam deuh taka chhutin Mizoramin thla khata buhfai a mamawh hi quintal nuai khat vel a ni.
Card vara ration buhfai lak man tih san kan ngaihtuah – Supply minister
