Daily Newspaper

Cardi B leh Megan Thee Stallion ‘WAP’ a Hot ber

16

Cardi B ‘WAP’ featuring Megan Thee Stallion chu Billboard Hot 100 (singles) chart No.1-ah a debut a, hetihrual hian Juice WRLD leh The Weeknd leh Lewis Capaldi te pawh top 10-ah an lang.

‘WAP’ hi Cardi tan he chart-a No.1 kai thei hla pali a neihna niin, Megan Thee Stallion tan chuan a pahnihna a ni ve thung. ‘WAP’ hi Hot 100 chart kum 62 history chhunga chart No.1 kai thei hla 1,108-na a ni.

He hla hi August ni 7-a a tlangzarh kha niin, US-ah kar khat chhungin (August ni 13 thlengin) vawi maktaduai 93 stream hman a ni a, Nielsen Music chuan hla tlangzarh thar a kar khatnaa stream nasat ber niin an sawi a, a hmaa record, Ariana Grand hla ‘7 Rings’ an tlangzarh atanga kar khat chhunga vawi maktaduai 85.3 stream record chu a rawn khum ta a ni.

Billboard Hot 100 (singles) chart hi kar khat chhunga US-a hla lar dan tehna chart a ni a, US-a genre hrang hrang streaming, radio airplay leh sales data atanga chart ranking hi siam thin a ni.

Cardi B hian a hla dang ‘Bodak Yellow (Money Moves)’ chu October, 2017 khan chart No.1 a kai pui tawh a, Bad Bunny leh J Balvin te nen April, 2018 khan ‘I Like It’ an No.1 pui leh a, Maroon 5 a feature-na ‘Girls Like You’ chu September 2018 khan a No.1 tawh bawk a, tihian ‘WAP’ nen chart No.1-a lang thei hla pali a nei tling ta a, chart No.1 a nih chhung belhkhawm hi kar 12 a tling tawh a ni.

Megan Thee Stallion tan chuan No.1 kai thei hla pahnih a neihna niin, ‘Savage’ featuring Beyonce chu kum chanve hmalam khan a lo No.1 pui tawh bawk a ni.

DaBaby hla hit, he chart-a kar sarih chhung No.1 thei ‘Rockstar’ featuring Roddy Ricch chu No.2-ah bawk a awm leh a, chart-a kar li chhung No.1 thei The Weeknd ‘Blinding Lights’ chu No.4 atangin No.3 a kai thar leh ta a, Jack Harlow ‘Whats Poppin’ featuring DaBaby, Tory Lanez & Lil Wayne chu No.3 atangin No.4-ah a tawlh ve thung.

Kar kalta No.1 Harry Styles ‘Watermelon Sugar’ chu No.1 atangin No.5-ah a tawlh a, SAINt JHN ‘Roses’ chu No.5 atangin No.6-ah a tawlh a, Jawsh 685 leh Jason Derulo ‘Savage Love (Laxed – Siren Beat)’ chu No.7-ah bawk a la awm.

Juice WRLD leh The Weeknd ‘Smile’ chu No.8-ah a debut. Juice WRLD hi December 2019-a kum 21 mi chauh ni a OD-a chatuan ram pan ta kha a ni a, a thih hnuah Hot 100 chart top 10-ah hla pasarih a nei tling tawh a, kumina Hot 100 chart top 10-a lang hnem ber a la ni a, ‘Smile’ hi chart top 10-a a lan vawi kuana a ni bawk. The Weeknd tan chuan Hot 100 top 10-a lan 11-na a ni ve thung.

‘Smile’ hi Juice WRLD album ‘Legends Never Die’ album atanga a hla Hot 100 chart top 10 kai thei parukna a ni a, he album hi July ni 25-a an tlangzarh kha niin, Billboard 200 (albums) chart No.1-ah a debut nghe nghe a ni.

Chris Brown leh Young Thug ‘Go Crazy’ chu No.9-ah bawk a la awm a, hetihrual hian Lewis Capaldi ‘Before You Go’ chu top 10 khartu niin, No.11 atangin No.10 a kai thar a, Capaldi tana Hot 100 chart top 10 kai thei hla pahnih a neihna a ni a, nikum November khan a hla ‘Someone You Loved’ chu kar thum chhung a lo No.1 tawh a ni.

(THE AIZAWL POST – Thalaite Huang)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy