Daily Newspaper

Casillas a chawl ta

11

Khawvela si nghak hriat hlawh leh hlawhtling ber pawl Iker Casillas chuan football a chawlhsan thu Twitter kaltlangin a puang.

Kum 39 mi Casillas hi thla 14 kal tan khan heart attack in a tlakbuak a, a thih phah teuh hle. Dinhmun hlauhawm takah hun engemawchen a din hnuin a tha chhuak leh a. Dam khawchhuak leh mahse football erawh a khel zui tawh lo. A khelh mekna FC Porto chuan player-coach angin an ruai chhunzawm. A inkhel leh thei mai tura ngaih a nih laiin thawhlehni khan a kut kawr dahtha in, football a chawlhsan tur thu a puangchhuak ta nge nge a ni.

Singhak ropui Casillas hian La Liga club lian Real Madrid-ah a hun tam zawk a hmang a, a chawrchhuahna club-ah hian a hming a chher zui hle nghe nghe. Santiago Bernabeu-ah hian kum 16 chhung zet a cham hman a, vawi 725 zet a khelhsak hman. Real Madrid hi hlawhtlinna hrang hrang a chanpui a, champions league-ah vawi thum a champion pui a. La Liga-ah vawi riat a champion pui bakah Copa del Rey-ah vawithum a champion pui a. Fifa club World Cup-ah vawikhat, UEFA Super Cup-ah vawihnih, Intercontinental Cup-ah vawihnih leh Supercopa de Espana-ah vawili a champion pui bawk.

Kum 16 zet nuam ti taka a chamchilh a, hlawhtlinna hrang hrang a chanpui tawh Real Madrid hi kum 2015 khan a chhuahsan a, Portugguese club lian FC Prto a zawm. Porto tan hian vawi 116 zet a khel tling leh hman. Portuguese Primeira Liga-ah vawihnih a champion pui a, Portuguese Cup-ah vawi khat a champion pui bawk. Heart attack in a tihbuai vangin a tum lawk aia hmain football a chawlhsan a ngai phah. Casillas hian Spain FA President chuh a tum hman uaih uaih a, chuh tlang lovin a inhnukdawk leh ta zawk.

Club tan hlawhtlinna hrang hrang a chang a, champion theihna zawng zawngah a champion rual hian Spain tan pawh hlawhtlinna hrang hrang a chang bawk. Kum 2014 khan inelna ngaihhlut hlawh ber Fifa World Cup-ah a champion pui a. Euro-ah kum 2008 leh 2012 khan a champion pui leh bawk. Spain tan hian vawi 167 zet a khel tling hman bawk.

Football a khelh chhung hian FIFA FIFPro World XI ah vawinga a tel a, tum nga zawt IFFHS chuan si nghak tha ber ( best goalkeeper in the world) ah an thlang bawk. Heng chawimawna bakah hian Prince of Asturias Award for Sports, the Grand Cross of the Royal Order of Sports Merit, the Gold Medal of the Royal Order of Sports Merit and the Gold Medal of the Community of Madrid chawimawina dawngin. Club leh ram tan hlawhtlinna hrang hrang a chang bawk a ni.

The Aizawk Post

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy