Kum tawp hnaih lamah Spanish La Liga hmahruaitu Barcelona an talbuai chhunzawm a, Inrinni zana an chhuahvahnaah second half minute hnih lek chhunga goal hnih chhuahin mualneitu Celta Vigo laka sihnih faia an hmahruaina an hloh a, 2-2 result nen lunghnur taka khelmual chhuahsanin, an league match khelh hnuhnung pahnih atangin hmahruaitu team hian point khat bak an hlawhchhuak zo lo!
Nizan result tarlan hman lohah table-a pathumna luahtu leh champion lai ni bawk Real Madrid-in Leganes khelmual atanga point thum an hawn thei bik a nih chuan hmahruaitu Catalan team nena an inkar hi point li lekah an pawthnai thei tawh ang.
Vigo khaw khelmual Estadio de Balaidos chhunga mipui 24,573 pungkhawm hmaah mikhual Barcelona hian minute 15 an khelh tlin rualin hmahruaina goal an thawkchhuak a, he goal hi J. Kounde siamsak atanga captain Raphinha tihluh niin, season kal lai inelna hrang hrangah Leeds United player hlui hian a club vawn lai tan goal 13 a thun tling chiah a ni.
Celta hian an siphurh tumin an nawr na mar hle a, half-time dawnah phei chuan penalty hlawhchhuak mai thei dinhmunah dingin, an player Iago Aspas chu box chhungah yellow card hmanga fimkhur tura zilh tawk tawh Gerard Martin chuan a titlu ni ngeiin a lang a, mahse, referee berin spot-kick a pe lo a, Liverpool forward hlui Aspas-a thinrim tal vel chuan yellow card a hlawh phah nghe nghe.
Second half tir lam minute 61-ah hmahruaitu zawk ni chungin Barcelona bawkin goal an khung hmasa leh a, mikhual goal hnihna hi goal ban a chhuihper dawp hnua Raphinha chhawpsak niin, a ball tha hmuh hlah zen zen lo Robert Lewandowski chuan season kal laia a La Liga goal 15-na a thun a, tunhnai international break hma chiaha Real Sociedad muala sikhat faia tlawm Barca-in an mamawh hnehna an sualchhuak thei dawna ngaihna a lian lo thei lo.
Celta Vigo lamin kut benga an khelmual chhuahsan an lo tum awzawng lo a, minute 84-ah Alfon Gonzalez chuan mualneitu team siphurh pakhat zawk sutin, he goal an thah atanga tuibur hmuam da pawh tling loah Hugo Alvarez chuan Celta goal hnihna a thawh ve leh a, hmahruaitu team-in goal dang an khung belh hman tawh lo!
An hmahruaina goal hnih an hloh hma lawk hian Barcelona player Casado chu yellow card vawihnih hmuh tlin vangin hnawhchhuah a ni a, mualneitu team-in a tam zawk nihna an chhawr a tih loh theih loh ang.
An chhuahvahna lam atangin point thum hawn zo lo leh mah se Barca hian point 34 hum chungin La Liga standing-ah hma an hruai chhunzawm a; he thu buatsaih laia pahnihna luahtu Atletico Madrid lakah point ngaa sangin, pathumna Real Madrid nen phei chuan point sarih laiin an thlau a, game hnihin Real hian an khel tlem zawk thung.
Hnehnain Simeone-a game 700-na an lawmsak
An head coach Diego Simeone-a mellung thar phun zanah 2-1-in an mikhual Deportivo Alaves an hneh a, Spanish La Liga table-ah an hmelma lian Real Madrid nekchhuakin Atletico Madrid chuan pahnihna an luah chho nghal bawk.
Inrinni Madrid khawpuia Metropolitano stadium inkhel kha Atletico boss ni chunga Simeone-a game 700-na chiah niin, hun tawp hma minute li chiah awm tawhah Alexander Sorloth chuan team pahnih danglamna thlentu goal pawimawh a khung a, table-ah Real Madrid nekchhuakin pahnihna an luah chho.
He match-ah hian Alaves lamin a tir lamah penalty atangin hma an hruai a, minute saihna leka Javi Galan-a handball hirnchhuah penalty hmangin Jon Guridi chuan Jan Oblak-a tluk lohna lamah goal hmahruai a chhuihlut.
Guridi goal hi second half minute 76-ah Antoine Griezmann chuan spot kick hmang bawkin a sut a; second half substitute Sorloth chuan hun tawp dawnah season kal laia a goal ngana hmangin mualneitu team chakna goal a khung zui ta a ni.
A pa mellung phun zan khan Diego Simeone-a fapa Giuliano chuan goal khung lo mah se second half-a mualneitu team game chawikangtu langsar niin, man-of-the-match award dawng thei hial khawpin a pa game pawimawhah a khel tha.
Inkhelh banah Giuliano chuan, Game 700 hi tam tak a, ka lawmpui e. He result hi amah leh kan supporter-te ta ni rawh se
“Inbeihna tak tak hmachhawn tura he hmun rawn lut Alaves kha an thawkrim a, kan tan harsatna pawh an thlen nasa a, kha kha an nih dan ve reng niin, an khelh dan pangngai a ni.
“Keima zawnah chuan khelmual ka luh hnua ka khelh dan avang khan ka hlim a,chu aia la pawimawh zawk chu hnehna kan chang kha a ni,” a ti.
Inrinni zan inkhel dangah Girona chuan 4-1 tehrengin an mikhual Espanyol an sawp a; Girona tan hian Bojan Miovski chuan goal pui tak pahnih thunin, Bryan Gil leh Ladislav Krejci-te’n goal khat ve ve an thawh ve bawk.
Season liamtaa barakhaih result nei mawlh mawlh Girona hian inkhel danga Las Palmas laka 3-2-a tlawm Mallorca point kawl zat 21 nihrulin table-ah pangana an luah a; Nilaini zan Champions League inkhel pakhatah Austrian side Sturm Graz an hmachhawn zui leh nghal dawn a ni.
Tun season away game-a hnehna la chang ve lo Espanyol hian point 10 neiin table-ah 19-na an luah a; relegation zone atanga inhaichhuah an tumna kawngah kartawp Inrinni hian Celta Vigo an hmachhawn ang a, Pathianni zanah Girona-in Villarreal an tum thung ang.
.
Celta mualah Barca chak zo leh lo!
