Thawhleh zing khan NBA conference play-off semi-final khelh chhunzawm a ni a, Boston Celtics chuan Cleveland Cavaliers hneh nawn lehin, series ah 3-1 in hma an hruai. Celtics in final an hnaih lai hian Oklahoma City Thunders chuan Dallas Mavericks an nihrual ve thung.
Series ah 2-1 a hmahruai mektu Boston Celtics hian semi-final game nganaah bul an tan tha viau a, quarter khatnaah point 7 zetin an chungnung nghal. Quarter khatnaah chetha lo mah se quarter hnihnaah Cavaliers an insiamtha a, point hniha chungnungin an Celtics nen an inkar an tizim. Quarter hnihnaah hnufual bawk mah se Celtics hian point 5-a hmahruai chungin chawlhlawk an hmang.
Chawlhlawk hnu lamah an inhnehtawk zui viau a, inkhel pawh a hmuhnawm hle. Quarter thumnaah point ngain Celtics an chungnung a, chak turin dinhmun thaah an inhlangkai. Quarter hnuhnung berah tlawm pumpelh hram tumin Cavaliers in tan an khawh a, point ngain an chungnung. Quarter hnuhnung berah chungnung bawk mah se Celtics lakah hian point 109-102 in an tlawm zui ta tho a ni.
Semi-final game linaah an chak leh tak vangin Boston Celtics hian Eastern Conference final an hnaih viau tawh a, game thum khelh hmabak la awmah final lut turin vawi khat chak chiah an mamawh tawh. Thawhleh zinga an chak tum hian Celtics tan Jayson Tatum chuan point 33 a thawkchhuak a, Jaylen Brown chuan point 27 a thawkchhuak ve bawk.
Celtics in final an hnaih lai hian inkhel dangah Oklahoma City Thunders chuan Dallas Mavericks lakah hnehna an chang a, series ah 2-2 niin, final luh beiseina sang zawk an nei thar.
Point 100-96 a Mavericks an hneh tum hian season kal meka khel tha tak, MVP thlannaa pahnihna ni phak hial Shai Gilgeous-Alexander a khel tha leh viau a, point 34 a thawkchhuak.
Celtics in 3-1 in hma an hruai
