Sawrkar laipuiin hmasawnna hna thawhna atana ruahmanna a siam leh sum a rawn pek chu mahni hmalakna anga sawi thin political party an awm tih BJP Mizoram president Vanlalhmuaka chuan a sawi a. Mipuiin thil dik kan hriat a tul tih a sawi.
Zirtawpnia an office-a inkhawmah BJP Mizoram State president chuan Mizorama hmasawnna hnathawh hrang hrang kan hmuh thin chu sawrkar laipui hmalakna deuh vek a ni tih a sawi a. Aizawl by-pass road, Aizawl khawpui traffic jam tih ziaawmna atana central hmalakna pawh tute emaw chuan an party hmalakna anga sawi ta mai leh sawrkar hmasa an rin loh vanga tun sawrkara rawn pechhuak ta anga mipui hnena puangzar an awm tih sawiin, “Mizoram mipui hian thudik leh thil dik kan hriat a hun tawh,” a ti.
Inkalpawhna kawngpui siamna tura kan hmuh, Aizawl to Tuipang, Seling to Dulte, Keifang to Tuivai, Silchar to Sairang four lane leh a dang pawh, Mizoram sawrkar zawkin a thawhpui that loh avangin hna a kal chak thei loa, tun sawrkar pawhin heng hnathawh hi enpui a, harsatna awmte an chinfel thuai loh chuan kawngpui siam hna hi duh angin a kal chak thei dawn lo tih Vanlalhmuaka hian a sawi.
“Central-in kawngpui tha min pek an tum a, keini’n central sum atanga hlawkna lo lak a, diklo taka compensation duh vanga kan buaite hi a Kristian loin a zahthlak hle. Mahni ram neih sa niloah a ti thei deuhin khawtlang hruaitute nen inremsiamin, ram kan nei chawp a, sum kan atchilh lutuk avangin hnathawh kal lai pawh a nih tur ang a ni thei lo ta hial hi a zahthlak. Mipui tana hmasawnna hna a awm dawn chuan ka ram hi sawrkar chuan nei rawh se, tia Mizoram tana inpe phal ngam zawk kan neih hlan a nghahhlelhawm hle,” a ti.
BJP-in development politics a kalpui mek chu a nihna ang taka kan chhawr ve hun a nghahhlehawm, tiin, Mizoram mipuiin development kan duh a nih chuan ngaihtuahna kan sen a ngai takzet tih a sawi a ni.
Central hmalaknaah mahni hmalakna anga sawi an awm – MBJP president
