Zoram political party zingah central hriatpui manifesto nei chu BJP chauh a ni a. State sawrkar tha tichak a, sum harsatna ata khaichhuak turin Lok Sabha inthlanah BJP candidate a tlin a ngai tih state BJP president Vanlalhmuaka chuan a sawi.
Lok Sabha inthlan atan Street Campaign neiin Inrinni zinga Zemabawk Venglai Bazara thu sawitu BJP Mizoram State president chuan, manifesto hi Mizoramah chuan kan inziahthat siak mai mai thin a, mipui lunglen zawng leh lungkuai zawngin a siamtuten an siam thiam viau a, beiseina sang tak nen mipuiin kan thlan phah thin tih a sawi.
Manifesto tihlawhtling tur chuan central puihna a ngaih tlangpui avangin, Mizorama party hrang hrangte manifesto hi central hriatpui lem loh ‘risk manifesto’ a ni, tiin, “Keini party chu inziahthat siak thinte zingah hian kan tel ve loa, central hriatpui awmchhun manifesto nei chu BJP chauh a ni. Chu mai niloin, BJP Mizoram Election Manifesto Committee-in state mamawh tur kan ziah, head hrang hrang tan sum min dah sak a, keini ngaihtuah phak bakin manifesto atan sum min dah sak a ni,” a ti.
Central-ah Mizoram tan huaisen taka ding a, state dangte nen kan inkara buaina a awm chang pawha sawrkar laipuia neitu nihna nen ngampa taka sawi thei tur MP kan neih ve a ngai tih Vanlalhmuaka hian a sawi a. Chutiang MP chu BJP MP a ni tih hriain MP inthla turah hian state hmasawnna atan leh state sawrkar harsatna ata chhanchhuaktu tur kan thlan chhuah ngei a tul tih a sawi a ni.
Central hriatpui manifesto nei BJP-in MP neih a ngai – MBJP president
