Site icon The Aizawl Post

Centre-a hnathawk ten OPS ngiat

Confederation of Central Government Employees and Workers leh All India State Government Employees Federation te chuan Cabinet Secretary Rajiv Gauba hmuin old pension scheme (OPS) hmang leh tur leh National Pension Scheme (NPS) sut turin an ngen.
Officer rual te chuan lungawilohna lantir bawkin ‘rim taka an thawh chhuah’ humhim a nih theih nana hmalak zui zel an tum thu an sawi bawk a.
Gauba hnena lehkha an thawnah Centre in ‘neo-liberal policies’ a kalpui te chuan India civil service chu dinhmun chhe takah a dah mek an ti bawk a. Sorkar economic policy thar chuan sorkar chu sector tin atanga inhnukdawka civil service tihtlem zel a hring an ti a. “Outsourcing, contractualization leh privatisation te a nasa zel a. Hnaruak nuai chuang hnawhkhah lova awmin hei vang hian hnathawk mekte tan hnathawh sen loh a awm phah a ni,” an ti.
Sorkar hnathawkte tana Defined Benefit Pension Scheme, or OPS chu thatak leh mi tin tana social seucrity scheme tha ber a ni an ti bawk a.
“Neo-liberal globalisation-ah Privatised Pension Scheme chu economic offensive hawlhlar ber a ni mek a, hei hian khawvel huapin hnathawkte chu a chim mek a ni,” tiin an sawi bawk a. Tun hnaiah Rajasthan, Jharkhand, Chhattisgarh, Punjab leh Himachal Pradesh sorkar te chuan OPS chu hman leh tura an tih thu an ziak lang tel bawk a.
Centre chu Pension Fund Regulatory and Development Authority Act sut tur leh NPS subscriber te chu Defined Benefit Pension Scheme hnuaiz ziak lut vek turin an ngen bawk a.
“Central Civil Service hnuaiah hna ruak 10 lakh chuang a awm mek a. State tam takah sanction post zahve vel te chu contract/outsourced/daily waged employees anga hnawhkhahin a awm bawk a. Last-grade post nuaibi hmiah ani tawh bawk a, contract appointment chu dinhmun sang ber berah pawh kalpui a ni ta bawk a. Union Government leh State Sorkar tam ber tena recruitment policy a rilru puthmang an siam hi a inang viau a ni,” tiin a sawi.

Exit mobile version