MP atana thlantlin a nih chuan sawrkar laipui hnuaia kuthnathawktute tana hamthatna awmte tun aia nasa zawka haichhuah an tum dawn tih Richard Vanlalhmangaiha chuan a sawi.
Thawhtannia Lok Sabha MP inthlan atana Ngopaa an campaign-naah ZPM candidate chuan, Pathian leh mipui zara MP atana thlantlin a nih chuan ramin hmasawnna rotling a neih theihna’n theihtawp a chhuah dawn a, Mizoram sawrkar leh sawrkar laipui inkara indawrna leilawnah a tang dawn tih a sawi.
State chhung leh pawnlam tan a tangkai thei ang berin hna thawk turin a pen chhuak dawn tih sawiin, “Sawrkar tharah kuthnathawktute chawikan nan hma nasa taka lak a ni dawn a, tunlai thiamna leh khawl changkang zawk hmangin loneitute tana awlsam leh hlawk zawka thlai thar sawngbawl dan pawh ngaihtuah a ni zel dawn. Chumi atan chuan sawrkar laipui hnuaia kuthnathawktute tana hamthatna awmte tun aia nasa zawka haichhuah kan tum dawn a ni,” a ti.
Centre atan kuthnathawktute hamthatna haichhuah tum ang – Richard Vanlalhmangaiha
