Nimin piah maia Lok Sabha-in Forest Conservation (Amendment) Bill, 2023 a pawm tak kha, northeast state-te tan chuan bill lawmawm loh tak mai a ni a. Han chhut chet chet hian, a tuartu tan chuan, Centre hian India hmarchhak state-te hi min pal phul hle, a tih theih ang.
A chhan chu, northeast state-te hi state tê tak tê tê vek kan ni a, Assam tih loh, state dang zawngte hi chu international border thui tak nei deuh vek kan ni. He Dan tharin min hual chepna thil chi hrang hrang a ken telte hi chu lo dah tha ta rih ila, international border atanga ram chhung km 100 china Centre-in security thil chhuanlama a duhna hmun apianga sipai hmun a hung thliah thluah thei tur chauh pawh hi a tawrhhlelhawm dawn hle a ni.
North east state-te hi international border atanga ram chhung lam km 100 han teha state pumpui hawlh tlang deuh vek a nih avangin, ‘khawi hmunah pawh’ Centre chuan a duhthalin ramngaw e, ramngaw lo e sawi lovin, dodalna awm thei lovin a thiat hmiah hmiah thei dawn tihna a ni ber a. State sawrkar/mipui lamin thuneihna kan nei dawn hauh lo tihna a ni. Dan tharah chuan hetiang infrastructure dinna tur hi hmun khatah hectare 10 chin zel a ni ang tih ni bawk mah se, international border pahnih karcheha awm Mizoram angah hi chuan, chhak lam leh thlang lamah hmun hnih/thum ve ve-ah security infrastructure dah a ngai, a tih tlat chuan, a panna kawngpui sialna tur zawng zawng nen, behbawm dang tam tak a nei dawn bawk a; kan ram chhung hi sipai ten an dai pherh vek thei mai dawn tihna a ni.
Hei hian mihring khawsak phung chauh pawh ni lo, nungcha leh environment-in nasa takin a tuar ang a, environment-a innghat mihringte kan buai vek dawn tihna a ni.
He thil hi, Dan hmanga thiam taka northeast mite neksawr tumna a ni hial lo maw, a tih theih a ni.
Centre-in NE state pal phul…?
