Sawrkar laka phut neiin Mizo Students’ Union chuan Thawhtanni khan New Delhi-ah punkhawm a huaihawt.
MSU Gen. Hqrs bultumin January 30 khan Jantar Mantar New Delhi-ah peaceful demonstration (Delhi Chalo, Delhi Jaggo) neih a ni. Resolution an pass zingah Chin-Mizo-Kuki hnam hrang hrang India rama lut zawng zawng chu sawrkar laipuiin thlawp turin an phut.
MSU president Samuel Zoramthanpuia chuan Mizote chu ramdang amite ang bawka Indian kan nih thu leh, chutianga Mizo community chu India miten an hriat ve a tul thu a sawi a. India sawrkar chuan nasa zawka Mizote a ngaihsak a tul tih sawiin, “Mizo-Chin – Kuki te hi tobul inang, culture leh thlahtute inang kan nih avangin, heng kan unau rambuai avanga rawn pemte hi lo pawm turin kan phut a. Myanmar-a kan unauten India pawna zin theihna tur exit permission pawm turin kan phut a ni,” a ti. India chu democracy ram lian ber a nih angin Myanmar ramin democracy a neih theih nana thlawp turin an phut tih a sawi bawk.
An thil phutte a hlawhtlin theihna’n MSU chuan pen khat pawha a hnungtawlh loh tur thu MSU president hian a sawi.
MSU resolution te :
1. Mizo mipui leh khawtlang hi India ram leilungfa kan nih zia hi ram mipui hnenah hriattir a, thlamuang taka awm kan phu.
2. Myanmar ramin zalenna a sual mek hi India-in thlawp rawh se.
3. Chin-Mizo-Kuki hnam hrang hrang India rama pemlut zawng zawng hi India sawrkarin thlawp turin kan phut.
4. Myanmar atanga raltlanten exit permit an neih theihnan India sawrkar kan phut.
5. India rama state ralmuang ber Mizoram hi kan humhim zel ang.
6. United Nations High Commissioners for Refugees(UNHCR) hian North-East India-ah office nei a, thuthmun rem turin kan ngen.