Kumina Mizorama MLA inthlanpui neih tura inbuatsaihna thlithlaiin Mizoram chief electoral officer Madhup Vyas chuan Ningani khan Mamit a tlawh a. District election officer/ district bawrhsap VL Remliana, Mamit district-a Assembly bial pathuma ERO leh AERO bakah election officer-te a kawm.
CEO chuan kumin inthlan turah election official-te chu Election Commission of India duhdan zirchiang a, mipui a tam thei ang berin vote an thlak theih dan tur leh inthlan felfai leh thianghlim a awm theihna’n theihtawp chhuah turin a fuih.
Strong room sak thar, EVM dahna warehouse, Counting Hall tura ruahman pathum, polling official-te dispatch leh reception hmun turte CEO hian tlawhin a endik a. EVM dahna warehouse endiknaah hian political party hrang hrang aiawhte an tel.
Election official-ten ruahmanna an siam hunah Mamit district-a hman tur EVM a that leh that loh endikna political party hrang hrang aiawhte nen first level checking neih a ni dawn a. EVM neih zawng zawng atanga zaa 1-ah vawi 1200 vote thlak chhin a ni anga, zaa 2-ah vawi 1000 thlak chhin leh tur niin, zaa 2 dang lehah vawi 500 thlak chhin a ni anga, vote tla zat leh VVPAT-in a lo chhinchhiah zat a inmil em, tih endik leh vek a nih dawn tih CEO ha thutkhawmah hian sawi a ni.
CEO-in inthlan inbuatsaih dan enfiah
