Daily Newspaper

Chak chunga bul tan Nadal leh Thiem

28

A grand slam singles title 20-na tur beiseia Paris khua thlawklut Rafael Nadal chuan mipa lama major title la ngunber Roger Federer-a record kawl lai tluk a tumna kawngah Thawhtanni khan hnehnain bul a tan a, US Open champion Dominic Thiem pawhin first round a paltlang ve bawk.

Roland Garros-a vawi 12 tehreng champion tling tawh Spaniard Nadal hian Belarusian Egor Gerasi-mov lakah darkar hnih leh minute nga chhungin 6-4 6-4 6-2 hnehna a chang a, a elpui world no. 83 tan Paris-a main-draw debut a ni.

Kum 34 mi Nadal hian ranked 211th American Mackenzie McDonald a tum leh ang.

Serbia world number one Novak Djokovic hnunga seeded second luahtu Nadal hian hripui vanga a thiamna leilung tournament sawnhlat a ni chuan kumdang zawng aiin French Open khelh a tiharsa zual niin a sawi.

Grand Slam singles-a vawi 19 champion tling tawh Nadal chuan Belaru-sian laka hnehna a chan hnuah tihsual neih a tum loh thu sawi chungin Paris leilungah inkhelh chu phurna leh thathonain a chenchilh reng tih a sawi zet a, mipui bo duak hnuaia inkhelh chu nidanga Ro-land Garros boruak nen danglam a tih thu leh hun dang zawng aia chona lian a nih thu a sawi a, second round a luh avangin bul-tanna tha a hlenchhuak ta phawt tih a tarlang tel.

Thawhtanni inkhel dangah Austrian third seed Dominic Thiem chuan 6-4 6-3 6-3-a Croatia player Marin Cilic hnehin, 2nd round-ah American quali-fier Jack Sock a tum ang.

New York khuaa a grand slam title hmasaber hlawhchhuak hlimhlawt Thiem hian tunhma lamin Roland Garros-ah final vawihnih a lo khel ve tawh a, kum 2018 leh 2019 khan a zawnin clay lalpa Nadal lakah a tlawm ve ve a, kumin hi chuan men’s singles draw thl<r thu-hmunah an awmdun ta tlat a, an chak chho zel a nih chuan semi-final lama an insut a ngai dawn a ni.

Kum 27 mi Thiem chuan New York khawlum thang huam hard court atanga Paris khawvawt clay leilunga insawn boruak sawilangin, ram vawt ve bawk Austria mi a nih avangin Paris boruak (13C)-ah a buai loh thu leh junior level-a a khawsak lai pawhin 10 degree wea-ther-a a khelh thin thu a sawi a, khawvawt hnuai khelh dan a thiam tawh thu a sawi.

Inkhel dangah Russian fourth seed Daniil Medve-dev a tlang zo ve ta lo a, Hungarian world number 63 Marton Fucsovics chuan 6-4 7-6 (7-3) 2-6 6-1-a vaw-tlain, mipa leh hmeichhe lam tiama seed luah pha tla hraw ber a la ni.

2019 US Open runner-up Medvedev hian kumin Flushing Meadows-ah pawh khan last four a thleng leh a, mahse, clay leilunga a chetchhiat kaltluang laklawh erawh a siamtha zo leh ta rih chuang lo a, April 2019 Barcelona final-a a chak loh atanga chhiar tanin clay leilung bikah match ruk zet a tlawm tluang tling ta!

First round paltlang tura beisei dang zingah 14th seed Fabio Fognini leh Canada 19th seed Felix Auger-Aliassime pawh Paris atangin an inpuhaw!

Kum 33 mi Italian Fognini hi top-50 player lo ni ve tawh Kazakh mi Mikhail Kukushkin chuan 7-5 3-6 7-6 (7-1) 6-0-in a hneh a; US Open khelh zawh taka fourth round lai thleng pha kum 20 mi Auger-Aliassi-me hi 7-5 6-3 6-3-in Japa-nese Yoshihito Nishioka chuan a vawtla ve bawk.

Seeded eighth ni chunga inlan French number one Gael Monfils pawh Thawhtanniah a tla hlawm ve tawp a, Ka-zahkstan player world number 49 Alexander Bublik chuan 4-6 5-7 6-3 3-6-in a barakhaih.

Thawhtanni vek khan French Open chanchina match khelh chhung reiber dawttu kan thlirliam a, Italian qualifier Lorenzo Giustino chuan darkar ruk leh minute nga chhungin Frenchman Corentin Moutet lakah 0-6 7-6 (9-7) 7-6 (7-3) 2-6 18-16 hnehna a chang.

Inkhelh banah Moutet chuan a taksa a chaw-mawlh vek thu sawiin, “Ka ruak vek a ni ber,” a ti!

Roland Garros history-a match khelh chhun reiber chu kum 2004 first-round-a Spaniard Fabrice Santoro leh Frenchman Arnaud Clement inkhel kha la ni chhunzawm zelin, kha match khan darkar ruk leh minute 33 chhung tehreng a awh a nih kha.

2010 Wimbledon-a John Isner leh Nicolas Mahut-te nithum chhunga darkar 11 leh minute nga inchai kha tennis match khelh chhung reiber a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy