Chak chunga lawmkim lo England

Inrinni khan Europe atanga World Cup 2026 khel tur zawnna khelh chhunzawm a ni a, England chuan mikhual an nihna hmunah hnehna chang bawk mah se, an khelh that tawk loh vangin an lawm a kim zo chuang lo. England rual hian Netherland pawhin inrinni zan khan hnehna an chang ve bawk.
Group K a hmahruaitu England hian point la hmu lova table mawngphah luah mektu Andorra chu Barcelona khawpuia RCDE Stadium-ah an hmachhawn. England hian minute 50-naa Harry Kane goal thun hmangin hnehna an chang a, point thum an hmuh belh. Three Lions hian goal thun belh theihna hun remchang nei bawk mah se an chhawr tangkai zo lo vek a, 1-0 chauhin hnehna an chang a, 1-0 chauha an chak hian mak tih a hlawh.
England khingpui Andorra hi Fifa ranking-ah 173 na daih an ni a. Football ram ropui England tan chuan awlsam taka hneh a, sawi hrep theih tura ngaih an ni. Andorra lakah German Bundesliga top-scorer Harry Kane goal khat thun hmangin an chak thei hram chauh a. He an chakna hian an mahni tantute duhkhawp a hlawh zo lo hle a, sawisel an hlawh zui phah. Manager Thomas Tuchel ngei pawhin an hnehna chan dan chu a duh khawpbik lo viau bawk.
England in Andorra lakah 1-0 a hnehna an chan lai hian Serbia leh Albania te chu goal awm lovin an lo inhnehtawk ve thung. Group K-ah hian vawi thum khel tawhin England an la chak vek a, table chung ber an luah. Pahnihna Albania in point li an hmu tawh a, Latvia in point thum hmu tawhin, Serbia in point khat an hmu tawh a, table mawngphah luah mektu Andorra in point an la hmu lo ve thung.
Netherlands an chak
Inrinni zana inkhel dangah Netherlands chuan mikhual an nihna hmun Helsinki Olympic Stadium-ah 2-0 in mualneitu Finland an hneh a, World Cup khel tur zawnna an hmachhawn hmasak berah hnehna changin point thum an hmu nghal.
Netherlands hian mikhual an nihna hmunah bul an tan tha viau a, goal an thun hma hle. Inkhel tan atanga minute rukna lekah Memphis Depay chuan hmahruaina goal a thun ngal zat. Hma takah goal an thun vangin an phur a, inrintawkna sang zawk nen an inlan chhunzawm a, an khel tha zui viau bawk.
Mualneitu Finland lamin an si phurh sut tumin tan khawh thin bawk mah se Netherlands tlarhnung an paltlang hlei thei lo. Hmahruai mektu Netherlands tan hian Denzel Dumfries chuan minute 23-naah an goal hnihna a thun belh zui leh. Darkar chanve an khelh tlin hmaa an goal thun pahnihte hi hun tawp thlengin an venghim a, hnehna changin point thum an hmu.
Group G-ah vawi hnih khela hnehna chang ve ve Poland in point ruk hmuin hma an hruai mek a. Netherlands laka tlawm Finland in vawi thum khel tawhin point li an hmu mek a, Netherlands chungah an la awm. Netherlands hian vawi khat chauh an la khel thung a, an chunga awmte lehpelh theihna hun remchang tha tak an la nei. Group G-ah hian Vawi thum khel tawh a point khat chauh la hmu Malta chuan table hnuai ber an luah.
Inrinni zana inkhel dangah Austria chuan 2-1 ion an mikhual Romania an hneh a, an match hmasa bera hnehna an chang ve nghal bawk. Austria tan hian Michael Gregoritsch leh Marcel Sabitzer ten goal an thun. Group H-a inkhel dangah Bosnia and Herzegovina chuan 1-0 in an mikhual San Marino an hneh a, khelh thum atanga point 9 hmuin group hmahruaitu an ni chhunzawm.