December 13, Thawhleh zan khan UEFA Champions League group match khelh zawh a ni a, champion lai Manchester City chuan Mimuala an khingpui Red Star Belgrade an hneh a, UCL ah a vawi khat nan chak vek chungin last 16 an lut. Manchester City an tlang chian em em lai hian EPL club Newcastle United chu an tualzawlah ngei an tlawm a, last 16 lut zo lovin an tla ve thung.
City tan Hamilton a vul nghal
Group champion ni chiang tawh Manchester City manager Pep Guardiola chuan a player tha zawkte awltir in, kum naupang zawk leh khelhna hmun chang tlem zawkte Red Star Belgrade lakah a chhawr a, a tisual lo. Rawlthar Winger Micah Hamilton chuan City senior team tan a khelh hmasak berah goal a thun nghal.
Rajko Mitic Stadium a lenglut Manchester City hian bul an tan tha viau a, minute 19-na lekah City tan a vawi khat nana khel kum 20 mi Micah Hamilton chuan Nunes siamsak atangin hmahruaina goal a thun. Hma takah goal an thun vangin inrintawkna sang zawk nen City an inlan chhunzawm a. Goal erawh an thun belh lawk thei lo thung.
Hun rei tak chhung goal an thun belh theih loh hnuin minute 62-naah Oscar Bobb chuan an goal hnihna a thun a, an hmahruaina a tizau. An mualah ngei si hnih faia an hnufual hnuin Red Star Belgrade in goal thun tumin tan an khawh thar a, goal pawh an thun ve ta thuai. Minute 76-naah Hwang In-Beom chuan goal thunin an si phurh a sut then.
2-1 hma an hruai laiin City in hun tawp dawn hnaih lamah penalty an hmu. He penalty hi Kalvin Phillips chuan harsatna tawk lovin a pet goal a, an hmahruaina a tizau nawn leh. Goal hnih a an hnufual nawn leh hnuin hun tawp dawn hnaih minute 90+1-ah Aleksandar Katai chuan goal thunin an si phurh a sut then nawn leh. An mualah point hlawhchhuah theih beiseina nei sang hman viau mah se goal dang an thun belh thei lo va, uiawm takin an tlawm ta a ni.
Kum naupang zawk leh khel khat zawk te enchhinna hun atan Pep Guardiola-a’n hmang mah se City in Red Star Belgrade an hneh ta tho a, UCL group match ah chak vekin Real Madrid record an nih rual ta a ni. Group G-a inkhel dangah German club RB Leipzig chuan an mikhual Young Boys chu 2-1 in an hneh a, pahnihnaah an insawh nghet. RB Leipzig laka tlawm Young Boys hian Europa League last 16 play-off an khel zui ang.
Newcatle an tlawm, an tla
Nilai zana UCL inkhel dangah English club hlun Newcastle United chuan an mualah AC Milan an mikhual. Last 16 luh beisei chhunzawm tura chak ngei ngei mamawh Magpies hi an mualah an tlawm a, table mawngphah ni chungin an puanthuah an tel zui mai a ngai.
An mualah chak ngei ngei tuma inlan Newcastle hian an mualah bul an tan tha a, goal thun hmasa zawkah an tang. Minute 33-naah Joelinton chuan hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah Italian Serie A club lian AC Milan in an si phurh sut ngei tumin tan an khawh a, goal pawh an thun thuai. Minute 59-naah Christian Pulisic chuan goal thunin an si phur a sut. Goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Newcastle in chak an mamawh em em laiin hun tawp dawn hnaihah an goal an chhuah. Minute 84-naah Samuel Chukwueze chuan hma an hruai letna goal a thun. Goal ven thiam tia hriat thin Serie A club lian hian an hma-hruaina vawnghimin hne-hna an chang zui a, point thum hlu tak an hmu.
Newcastle United lakah hnehna pawimawh tak chang bawk mah se AC Milan hian uiawm takin last 16 an lut phak chuang lo. PSG nen point riat ve ve an hmu a, tla zawkah an tang.
Chak vek chungin Manchester City an tlang
