Chak zawka vote chhiar theih vangin Election deptt an lawm

Tun Lok Sabha inthlanpuiah chak leh mumal nei zawka vote chhiar a ni ta chu thil lawmawm tak a ni tih State Election department chuan a sawi.
Election department chuan, 1-Mizoram (ST) Parliamentary constituency hnawhkhahna tura vote tla chhiar zawh a nih hnu ah June 6 hian election process zawhfel a ni dawn tih a sawi a. Mizoram district 11 huamchhunga Assembly segment 40-a vote tla chu Counting Centre 13-a Counting Hall 40 ah boruak muanawm tak hnuaia chhiar a ni tih a sawi.
‘22-Tuichang Assembly segment, Khawzawl district-ah vote chhiar zawhfel hmasak ber niin, zing dar 8.55 ah an chhiar zo a; chhun dar 12.00 hma khan a pumpuia vote chhiar hi zawhfel thawkhat niin, result tlangpui a hriat theih tawh a, chak leh mumal nei zawka vote chhiar a ni ta hi thil lawmawm tak a ni,’ a ti.
Kumin March 16-a ECI-in Lok Sabha inthlan hun a puan atanga a tul ang ang buaipuia inthlan hlawhtling tak buatsaih a nih theih nana theihtawp chhuahtu official-te chungah a lawm tih Election department hian sawiin, ‘Inthlan muanawm, felfai leh langtlang siam a nih theih nana theihtawp chhuahtu political party, security forces, media, kohhran, MPF leh NGO-te an fakawm a. Mipui chungah lawmthu kan sawi bawk a ni,’ a ti.