Mizoram sawrkarin chakai farm siam tuma pilot project a kalpuinaah chakai hmuh tur a awm loa, thlai chin na’n hman a ni tih ZPM Thalai chuan an sawi.
ZPM Thalai Hqrs. thuchhuak chuan February 13 khan an president Dr C Lalrammawia hoin Kolasib Dum luia SEDP pilot project Chakai Farm an tlawh a, cheng nuai 57 chuang senralna, chakai 48000 vel awm theihna tura ruahmanah hian chakai hmuh tur a awm loa, chakai awmna tura ruahmanah hian dhania, behlawi leh broccoli chin a ni tih a sawi.
‘Chakai awmna tura ruahman plot thum atanga plot hnihah chuan tui pawh a awm loa, plot dangah chuan thlai chi hrang hrang chin niin, Kolasib Dum luia chakai farm hi MNF sawrkar hmasaka Falkawn Referral Hospital-a ar vulh nen khan thil thuhmuna ngaih theih a ni,’ a ti a. Beisei loh taka chakai farm kalpui a ni chu pawi a tih thu a sawi.
SEDP trade-ah hial chakai farm chu mipui thlan theih tura telh a nih tawh lai a, a sulsutu chakai farm-ah pawh chakai pakhatmah hmuh tur awm loin a zuihral leh si tih ZPM Thalai hian sawiin, ‘MNF sawrkarah hian kuthnathawktute khaichhuah tumna tak tak a awm lo em ni, tih hi kan zawhna a ni a. Mipui hnenah thil thar hlui a nih dawnin zirchianna mumal tak awm se, thil hlawhtling tur chauh kuthnathawktute hnenah hlui ni rawh se, tih hi kan ngaihdan a ni,’ a ti.
Chakai farm-ah chakai a awm lo – ZPM Thalai
