Kumin MLA inthlanpuiah Champhai district MLA bial pathuma candidate zingah Congress candidate Dr Lallianchhunga chu sum hmang hnem bera anga chhinchhiah a ni.
23-Champhai North, 24-Champhai South leh 25-East Tuipui Assembly biala candidate-te sum senso dan chu Thawhtanni khan district election officer James Lalrinchhana hoin endik a ni a. Constituency pathuma candidate-ten inthlan vuakveta an sum hman dan tarlanna, candidate-te account bu (candidate expenditure register), Accounting Team-in an vawn ‘Shadow Observation Register’ leh bank statement endik a ni. Candidate-ten inthlana hman tura an bituk zat, cheng nuai 28 thleng chu dik takin hman a ni em tih chhut a ni a, diktakin an hmang vek tih pawm a ni.
Champhai South biala INC candidate Dr Lallianchhunga chuan Rs. 12,16,720 hmang nia insawiin heng bial pathuma candidate zingah hmang hnem ber niin report a ni. He biala MNF candidate TJ Lalnuntluanga’n Rs. 11,23,375 hmangin, ZPM candidate Lt. Clement Lalhmingthanga chuan Rs. 8,23,090 a hmang niin a document thehluhah hian tarlan a ni.
Champhai North bialah ZPM candidate H Ginzalala’n a hman zat tam berin Rs. 8,83,325 a ni a; Dr ZR Thiamsanga (MNF) Rs. 7,87,260 leh K Lalnunmawia (INC) Rs. 6,26,200 ten dawtin BJP candidate PS Zatluanga chuan Rs. 4,13,090 a hmang tih a thlen.
East Tuipui-ah MNF candidate Ramthanmawia’n Rs. 10,76,905; INC candidate C Lalnunthanga (Rs. 10,19,298) leh ZPM candidate Dr C Lalrammawia (Rs. 10,04,940) te an ni.
Expenditure final reconciliation hi December 28 hian expenditure observer hoin neih leh a ni dawn a ni.
Champhai district-a sum hmang hnem ber Dr Lallianchhunga
