National AIDS Control Organization chhinchhiah danin, Chamhphai district-ah HIV kai 1664 an awm a, hei hi district-a mipui cheng zat atanga chhutin zaa 2.97 a ni. NACO record hi kum 2022 ami a ni thung a, a thar ber a ni rih.
Champhai District AIDS Prevention and Control Committee chu an chairman, bawrhsap James Lalrinchhana hoin Thawhlehni khan an thukhawm a. An district chu ramri dep, ruihhlo tawlhrukna kawng a nih avangin ruihhlo engemawzat thlauh a ni a, thawhhona tha tak hnuaiah chak taka do niin, thahnem tak man a ni a; ruihhlo do hian HIV/AIDS dona kawngah awmze thui tak a nei tel, tiin a sawi a ni.
MSACS joint director (IEC) Zuiliani Hrahsel sawi danin, Mizoramah damdawi khawih leh mipat hmeichhiatna hman khawlohna atanga HIV kai an tam ber a; tunhmaa chuan ruihhloa inchiu leh hmeichhe inzuarte atanga HIV hluar bik anga sawi kha ni tawh loin, mipui mimirah a lut nasa tawh a, inkaichhawn theihna lakah fimkhur tlan a ngai hle tih a sawi a ni. Invenna tura pawimawh hriat a tul, tiin, a veite tan inhriatchhuah hma leh tha taka inenkawlna lak a tul a, hei hian HIV kaihhnawih natna tam tak a pumpelh tir thei tih a sawi bawk.
District AIDS Prevention and Control Committe kaltlanga HIV/AIDS chungchang inzirtirna tun aia changtlung zawka kalpui dan turte ngaihtuahho a ni. District chhunga khaw 67 leh zirna inahte HIV/AIDS awareness campaign neih a, uluk taka vil zui nise an ti.
Champhai district-ah HIV kai 1664
