Champhai Winery tihchangtlun zelna atan sawrkar laipui atangin cheng vaibelchhe 3.6 dawn a ni tih Agriculture minister PC Vanlalruata chuan a sawi.
Agriculture minister hian Ningani khan Champhai Winery a tlawh a, thawktute nen hmalak dan tur leh sawrkar hmachhawp an sawiho. Sawrkarin kuthnathawktute hmakhua ngaiin ‘Wine Rule’ a siamtha a, dan hnuaiah wine leh fruit beer a zawrh theih tawh dawn tih a sawi a. Champhai Winery chu kan rama winery processing lian ber pawl, kuthnathawktute pawhin an chhawr tangkai, hetianga an thlai thar chhuah atanga wine siam a ni hi Agriculture minister a nihna ang pawhin a lawm hle a, thlai dang atang pawha siam chhuah zel theih ni se a duhawm tih a sawi.
“Hetiang industry lian hi awm belh zel se, grape atang chauh ni lo thlai dang atang pawha wine siam chhuah theih dan ngaihtuah zel tum a ni a, kuthawktuten an thawhrim zar an zo zel theihna turin sawrkar chuan theihtawp a chhuah zel dawn,” a ti.
Tunhnai khan Ministry of Agriculture & Farmer Welfare hnuaia Market Intervention Scheme (MIS) atangin Mizoram Agriculture Marketing Board chuan sawhthing sawngbawlna atan Rs. 9,48,14,281.00 a dawng a; MIS atang vek hian Champhai Winery atan Rs. 3,68,84,297.00 an dawng bawk tih PC Vanlalruata hian a sawi a. Heng sum hi dik taka hman a nih chuan hmasawnna tluantling thlen thei a ni, tiin, “Kuthnathawktuten an thawh zar an zo ngei theihnan sawrkar hnathawkte pawhin ngaihtuahna tak tak an sen chhoh zel ka beisei a ni,” a ti.
Champhai Winery thawktute hian harsatna an tawhte an lo thlen chu Agriculture minister hian a theih ang anga lo bawhzui a tum tih a sawi bawk.
Champhai Winery tan vbch.3 dawng Wine siam belh dan ngaihtuah dawn
