Youth Services Department leh Mizo Zirlai Pawl tangdun buatsaih ‘Youth 20 Mizoram – Meet on Nationalism, Patriotism & Development’ tih thupui hmanga zirlai intawhkhawm chu Thawhlehni khan Champhaia higher secondary school leh college zirlaite tan buatsaih a ni.
He hun hmanpuitu minister TJ Lalnuntluanga chuan Youth 20 Meet hian ram leh hnam humhalh leh hnam inpumkhatna pawimawh zia thalaite thinlungah a tuh ngei a beisei tih a sawi a. Hnam changkang leh ropui apiangin an hnam an dah pawimawhin an ngaihsan thin thu sawiin, zirlaite chu mahni zawn theuhah hnam chawimawitu nih tum a, hnamdang nupui pasal nei lo turin a ngen. State dang leh ram danga cheng Zohnahthlakte ngaipawimawh a, an thlavang hauh kawngah pawh tanrual zel a tul tih a sawi bawk.
Sawrkar laipui Ministry of Youth Affairs & Sports chuan India ramin G-20 presidency a chelh chhunga India ram hmun hrang hranga Youth-20 programmes a hman mek chu Mizoramah pawh hman mek a ni a. G-20 Secretariat lamin phalna a pek angin, heng programme hi thalai leh zirlaite hnena Mizoram tan, ram leh hnam tana hmasawnna thil pawimawh tak tak inzirtirna hunah Youth Services department leh MZP hian buatsaihin hma an la a ni. Aizawl, Kolasib, Saitual leh Khawzawl ah neih tawh niin, Mizoram district zawng zawngah neih tum a ni.
Champhaiah Youth 20 Meet
