Champion lai PSG tlak thum tawkna Coupe de France!
Coupe de France khelh hnuhnung vawi ruka vawi li champion thei Paris St-Germain chu Thawhtanni khan defending champion an nihna tournament-ah hian an tla fel a, an khelmual hman thiam ngeiah sikhat faiin Ligue 1 kai thar ve mai Paris FC chuan an hnawtchhuak!
Season liamta khan a vawi 16-na atan French Cup-ah hian PSG an champion a, kuminah an title kawl lai hi humhim leh thei tura beisei an nih laiin last 32 an paltlang zo ta lo mai a ni!
Parc des Princes inkhel thunun hneh hle chungin mualneitu team khan goal an khung thei lo tluan chhuak zak a; second half minute 74-a mikhual chakna goal awmchhun leh champion lai tlawmna thlentu goal kha PSG-a a career bul tantu Jonathan Ikone-a tihluh a ni.
Goal awmchhun khungtu Ikone chuan, “Kan hlim takzet a, kan tlarhnung ven dan pawhin duhthu a sam thlap e.
“Ka goal thun avang khan ka lawm a, khati ang hlimna thlentu goal kha a tawpna a nih loh ka beisei,” a ti.
Luis Enrique team khan goal thun tumin chance nei mawlh mawlh mah se FC goalkeeper Obed Nkambadio a chetha a, vawi duai lo PSG goal khung tur dangin, hun pek belha Vitinha long-range shot a dansak kha a langsar ber pawl a ni awm e.
PSG tan tun kha kum 2014 hnu lama Coupe de France last-32 an paltlang zawh loh vawi khatna a ni.
Team pahnih hi tun thla tir khan tualchhung legue lamah lo intawng tawhin, kum 1990 hnu lama top-flight derby hmasaberah khan Desire Doue leh Ousmane Dembele goal khat ve ve tihluh hmangin Champions League title kawltute’n 2-1 hnehna an chang a, Thawhtanni zanah Paris FC lamin phuba an la ve ta a ni.
Champion lai PSG tlak thum \awkna Coupe de France!
