International break a awm a, FA Cup khelh a nih leh hnuin April 11, Inrinni zan atang khan Eglish Premier League khelh chhunzawm a ni leh ta. Inrinni zan hian champion chaka tuihal, champion tum em em Arsenal chu an mikhual AFC Bournemouth hneh lovin an tlawm. Arsenal an tlawm hian Manchester City phur tharna a pe a. Champion tuma inelna boruak a nung thar hlaui thei dawn.
Arsenal an zuih dawn em?
Point 7 a hmahruai fal mek a, an hnuai chiaha awm Manchester City nen point 10-a an inkar tihzau theihna hun tha nei Arsenal hian an mualah AFC Bournemouth an mikhual. European competition khelh phak tuma tan khawh mek Bournemouth hian inlehthalna lian an thlentir a, Emirares Stadium-ah ngei 2-1 in hnehna an chang a, inlehthalna lian an thlentir.
Emirates Stadium-a lenglut Bournemouth hian bul an tan tha a, goal pawh an thun hma hle. Inkhel tan atanga rei lo, minute 17-naah fuh zetin mualneitu Arsenal hi an nawr tlang a.
Evanilson siamsak tha tak chu Junior Kroupi chuan awlsam takin a pet goal a, hmahruaina goal a thun. Hmahruaina goal an thun vangin an phur viau a, an khel tha zui viau bawk.
Goal an chhuah vangin Arsenal in an si phurh sut ngei tumin tan an khawh zui nghal a, khel pawh an khel tha zui viau bawk. Na taka an khingpuite nawrin letin goal thun theihna hun tha pawh an nei naa an chhawr tangkai mai thei bik lo. Goal thun tum ngawrh tak Arsenal hian chawlhlawk dawn hnaihah goal thun theihna hun remchang an nei ta nge nge a, penalty an hmu. He penalty hi Viktor Gyokeres chuan a pet goal a, minute 35-naah an si phurh a sut. Gyokeres goal thun hnu hian chawlhlawk hmain goal dang a luh belh thei tawh lova, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal thun tumin an innawr tawn nasa hle. Mualneitu Arsenal in fuh takin an khingpuite an nawr tlang a, an si phurh sutna goal thuntu Viktor Gyokeres chuan hma an hruai letna goal a thun. Hmahruaina goal an thun vangin phur viau mah se offside vangin Gyokeres goal hi hnawl a ni ta thung a, Bournemouth an him hram.
Arsenal goal hnawl a nih hnuin Bournemouth an che fuh ve thung a, goal an thun belh leh ta nge nge. Tlarhnung phui tak, season kal meka goal chhuah tlem tak Gunners tlarhnung hi mawi leh chiang zetin an thiat a, an hun hlu neih an chhawr tangkai zui bawk. Bournemouth tan hian Alex Scott chuan minute 74-naah si nghak David Raya dan rual lohin a pet goal a, hma an hruai nawn lehna goal a thun.
Hnufual zawk an nih thar leh hnuin Arsenal in an si phurh sut ngei tumin tan an khawh zui nasa hle. Manager Mikel Arteta chuan hun tawp dawn hnaih lamah an player thlak kual in, goal thun ngei tum bawk mah se a hlawhtling zo lova, goal an thun theih tawh miau loh vangin hreh hle mah se an mualah ngei tlawm zawkah an tang lo thei lova, point an hlawhchhuak zo ta a lo a ni.
An mualah Arsenal an tlawm vangin an hmahruaina a derthawng ta viau. Gunners hian khelh 32 atangin point 9 in hma an la hruai. Point kua laiin hmahruai bawk mah se an hnuai chiaha awm Manchester City aiin vawi hnih ngawtin an khel tam zawk thung. City hi chak zel se, Arsenal khelh zat an khelh meuh chuan point thum chauhin an inthlau dawn a. Anni pahnih hi an la inhmachhawn zui dawn bawk vangin City hian Arsenal nih rual emaw, lehpelh emaw theihna hun remchang tha tak an nei. City hian Pathianni zan khan Chelsea an hmachhawn a, Stamford Bridge a an result in Arsenal dinhmun a hril thui thei viau dawn a ni.
Arsenal hnehtu AFC Bournemouth hian khelh 32 atangin point 45 an hmu a, 10-naah an awm ve mek thung. An khelh hmabak parukah an chetha a nih chuan European competition khelh phak theihna hun remchang an nei thei dawn a. Midang result-ah an innghat thui viau thung a ni.
Inrinni zana inkhel dangah Brighton & Hove Albion chuan mikhual an nihna hmunah si hnih faiin mualneitu Burnley an hneh a, point thum hlu tak an hmu.
Brighton tan hian Mats Wieffer chuan chawlhlawk dawn hnaih minute 43-naah hmahruaina goal a thun a, 1-0 a hmahruai chungin chawlhlawk an hmang.
Chawlhlawk hnu lamah pawh goal a lut har zui leh viau. Inkhel hmuhnawm takah goal lut a awm theih loh reng hnuin hun tawp dawn hnaih minute 89-naah goal hmahruai thuntu Wieffer chuan an goal hnihna thunin an hmahruaina a tizau. Wieffer goal hnih hi Burnley lakah hian an chakpui zui a, Mimualah point thum hlu tak hmuin pakuanaah an inhlangkai.
Brighton in hma an sawn a, European competition khelh phak an hnaih deuh deuh laiin Burnley erawh chuan tlakhniam an hnaih ve deuh zel thung a. An chunga awm mek nen point 10 laiin an inthlau tawh a ni.
Champion tum Arsenal an tlawm
