Champions League 2023-24 tan a ni dawn

Football club te inelna ngaihhlut hlawh ber UEFA Champions League chu zanah khelh tan a ni dawn. Zanin hian inkhel pariat a awm ang a, naktuk zanah inkhel pariat bawk a awm leh a.
UEFA Champions League (UCL) hi kum 1955 khan French tawnga Coupe des Clubs Champions Européens (European Champion Clubs’ Cup) tiin khelh tan a ni a, ‘European Cup’ tih chu hriat lar dan ber a ni. Inelna hmasa ber 1955-56-ah hian team 16 an tel. Parc des Princes-a final hmuhnawm takah Real Madrid chuan an khingpui Stade de Reims chu 4-3 in an lehthal a, champion hmasa ber a ni. Spain club lian Real Madrid hi inelna hmasa pangaah an champion zawn hial nghe nghe. Vawinga ngawt champion zawn Real Madrid hi hun kal zelah pawh club hlawhtling an ni chhung zawm a, vawi 14 zet champion tawhin, champion ngun ber an ni a. Champion ngun ber dawttu AC Milan aiin vawi sarih zetin an champion tam zawk mek.
Kum 1991-92 season thleng khan European Cup tih hming a la pu a. 1992-93 season atangin UEFA Champions League tiin a hming thlak a ni. ‘Champion League’ tih hming hi tun thlengin a la pu. Zanina khelh tan tur hi European Cup khelh tan atanga a season 69-na a ni a. ‘Champions League’ tih atangin a season 32-na a ni ve thung. UCL 2023-24-ah hian team 32 ten Group Stage khelin, champion an inchuh dawn a. Final hi khelmual ropui Wembley Stadium-ah khelh a ni ang. Final hi June 1, 2024-ah khelh tura ruahman a ni.
Champions League-a champion team hian €85,140,000 zet an hlawhchhuak phak. Group Stage-a chak apiangin €2,800,000 an hlawh zel a. An inhnehtawkin €900,000 ve ve an hlawh thung a. A tlawm zawk pawhin hlawh an nei teuh tho bawk. Round of 16 lut chinin €9,600,000 an hlawh a. Quarter-final-ah €10,600,000, Semi-final-ah €12,500,000 an hlawh a. Champion team in €20,000,000 an hlawh laiin pahnihnain €15,500,000 zet an hlawh ve bawk. Champion tan group stage atangin €85,140,000 zet a hlawhchhuah theih.
UCL 2023-24 Group Stage-a an inthen dan hi a khairual tha viau a, group harsa bik, ‘Group of Death’ tia sawi fal tur a awm meuh lo. Group A-ah German champion Bayern Munich leh English club ropui Manchester United an awm tlang a. Bayern leh United ten group champion an nih chuh tur hi a ngaihnawm dawn. Group khatah awm dun bawk mah se an awmpui Copenhagen leh Galatasaray te team huphurhawm tak an nih hran loh vangin Group harsa tia sawi hluai tur erawh a ni lo. Group F-ah Paris St-Germain, Borussia Dortmund, AC Milan leh Newcastle United te an awm tlang a. Group F hi group ngaihnawm ber an nih a rinawm. Hetihlai hian champion lai Manchester City chu Group H-ah Manchester City, RB Leipzig, Red Star Belgrade leh Young Boys te nen an awm tlang a, an tan tlang harsa lo tura ngaih a ni.
UCL 2023-24-ah hian champion lai Manchester City chu champion tura rinkai an ni leh ngei dawn. Pep Guardiola team te hi an puitling tlang tawh a, an inman em em tawh. Player tha tak tak an neih bakah goal thun lama inthlahrung lo tak Erling Haaland an nei tel tawh bawk nen hneh an hnar viau tura ngaih a ni.
Player langsar fal nei tawh lem lo mah se Real Madrid chu Real Madrid nge nge an nih leh a rinawm viau bawk. An ni hi chuan champions league hi an ngam riau a. Vawi 14 lai champion tawh an nih vangin an ta neih thiam riau a, boruak sangah an zam ve mai mai ngai lo. Karim Benzema chhuak mah se Jude Bellingham-a’n boruak a chhawk nung tha viau a, champion tura rinkai an ni lo thei lo.
Messi leh Ronaldo tel lohna
UEFA Champions League hi player ropui pahnih; Lionel Messi leh Cristiano Ronaldo ten hun rei tak chhung an lo mawi tawh a. Anni pahnih hi UCL tihlu zualtu an ni. Hun rei tak hnuah Messi leh Ronaldo te hi champions league-ah hmuh tur an awm dawn lo ve ve a, UCL a khawharthlak deuh ruih dawn. Saudi Arabia lamah Ronaldo a kal hnuin, Major League Soccer lamah Messi a kal zui ve leh. Player ropui fal pahnih Messi leh Ronaldo tel lohna UCL hian a hlutna a hloh then nual tura ngaih a ni.
UCL hi quarter-final atang lo chuan ngaihven hlawh tak tak zo lova ngaih a ni thin a. Lionel Messi leh Cristiano Ronaldo awm loh hnu hian hei hi a dik leh zual hle dawm niin a ngaih lawk thei.
Engtin pawn sawi se, tute pawhin khelin, khel lo se UEFA Champion league meuh hi chu a class a sang em a, sum a tam bawk si a. Player tinin an khelh chak a ni reng a. A hlutna erawh a bo tak tak thei dawn chuang lo thung.