Daily Newspaper

Chanchin lawmawm, negative thu

13

‘Sample’ han tih hian rilru-ah Covid-19 a lang a, ‘positive’ leh ‘negative’ pawh Covid-19 natna vei leh vei lo sawina a ni rih. ‘Thu positive’-in mi a tihlawm thin laiin tunlai chu ‘negative’ thuin mi a tilawm a, negative thu hi thu positive a ni mek. Tun hnaiah Aizawl veng thenkhat chu ‘negative’ thu an dawn avangin an lawm hle.

Tun hnai ni hnih ni thum velah Aizawl veng thenkhatin Covid-19 natna vei sulhnu chhui (contact tracing) vanga sample endik result a hlawmin an hria a, an ‘negative’ hlawm. Hei hi an vengte chauh ni lovin ram pum tan thu lawmawm a tling.

Positive 28 awmna, veng mala positive tam berna Venghnuai chuan Inrinni khan mi 132-te result an hria a, an negative vek. Anni hian mi 149-te result an la nghak.

Sample lak tam berna Durtlang-ah chuan Covid-19 natna an vei em tih hriat nan mi 518-te sample lak a ni tawh a, Inrinni khan mi 71-te negative thu an dawng.

Durtlang-ah hian positive hi 15 an awm a, result nghah lai 356 an nei. Anni hi September ni 17 leh ni 18-a sample lak an ni. Positive hriatchhuah mi 15-te hnua sample lakte an negative rih avangin an lawm hle tih thu dawn a ni.

Venghlui pawhin kar hmasa Zirtawpni khan mi 130 vel an negative thu an dawng. Khatla pawhin Chawlhni khan mi 78-te negative thu an dawng a, anni hian mi 17-te result an la nghak. Upper Republic-in Chawlhni khan mi 130 vel negative thu an dawng bawk. Lily Veng pawhin mi 69-te negative thu an dawng a, Chawlhni-a sample lak mi pangate result an la nghak.

Sample lak tamna Zemawbawk pawhin tun hnaiah mi 258-te negative thu an dawng a, mi 29-te result nghah lai an nei.

Nursery Veng pawhin thawk huaina tham result an nei; kar hmasa Thawhlehni-a mi 114-te sample lak result a chhuak tawh a, Chawlhni khan an negative vek tih thu an dawng. Anni hi local council inthlan atanga inchhui an ni a, vote chhiartu pakhat a lo positive avangin, amah nena intawk local council hruaitu thar mi pasarihte pawh inah an inkhungtir (home quarantine) nghal. An hruaitu tharte pawh an him tih hriat a ni ta a ni.

Aizawl veng dangah pawh result a hlawma hria hi an awm nual a, tun hnaiah hri kaite sulhnu chhui (contact tracing) a awm nual avangin veng hrang hrangah sample endik tur hi an pung a ni.

September ni 20-a result hriatah khan ram pum tana thil lawmawm a awm a, Falkawn damdawi ina sample 1504 enfiah zingah pakhat chauh a positive. A tuka result hriatah pawh mi 1030 endikah mi pali chauh an positive. Endik zat atanga chhutin positive an tlem a, hei hi thil lawmawm tak a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy