Daily Newspaper

CHANCHIN TAWI

10

Manchhuah phut
MPC Gen. Hqrs. chuan thuchhuah siamin, September 20, 2020-a Mizoram leh Tripura ramri depa village level task force ralven buk hal chu a dem takzet tih sawiin, a titute rang taka man chhuaka an phu tawk hremna pe turin Mizoram sawrkar a phut tih a sawi. ‘Tlawmngaih chhuaha hrileng laka kan himna zawnga ramri depa rammute bungbel leh riahbuk suasam saktu misualte chungah thil thalo zawk a thlen hmaa hma la thuai turin sawrkar kan phut a ni,’ a ti.

Thlai pe
Covid hri kai hmuhchhuah an tam tak deuh avanga kar hnih dawn inkharkhip tawh Tuikhuahtlang-in chawhmeh lamah harsatna an tawk tan tawh tih hria in Thiak khua chuan chawhmeh, thlai thar chi hrang hrang Sumo phur thum chu Inrinni khan an pe.

Thi-in hmu
September 14 atanga chin hriat loha bo MC Lalropianga (27), Siachangkawn Lawngtlai district chu Inrinni zing khan Tuipui Ferry-ah thia hmuh a ni. MC Lalropianga hi kar kalta Thawhtanni khan Chhimtupui Fungkah rama a inhlawhna huan atanga lawnga a lengchhuak chu a haw mai loh avangin zawn a ni a, a ke hniak leh pheikhawk hmuh ni mahse chhui zui theih lohin a bo a ni. Tuipui Ferry suar chhiaah balu la tur lawnglenga kalten a ruang an hmu ta nia thu dawn a ni.

Chesual thi
Lunglei district Dinthar khuaa awm Ramthianghlimi (4) d/o Isaka chu September 18 chawhnu khan an khaw daia tuikhura inbual tura a kal chu chesualin a tlahlum. Thudawn danin Ramthianghlimi hi an khaw daia inbual tura a kal hi a chin hriat zui a ni loa, zawn a nih hnu ah inbual a tumna kai thlang deuhah a ruang hmuh a ni. An chhungkua hi kum 2018 khan Tripura atanga Bru chhungkaw hruaikirte zing ami an ni.

Beirual thu
Zanin, September 21 zan atang hian Mizoram Baptist Kohhran chuan Beirual thuzir an tan dawn a. TV leh Youtube kaltlanga kohhran chhungtinten an hman theih turin Beirual thuzir kaihhruaina pawh an peihfel tawh a ni. Zirlaibu-in a tarlan angin thuzir indawt ang zelin TV leh Youtube-ah an pechhuak thin dawn a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy