Daily Newspaper

CHANCHIN TAWI

27

Nau nei
Covid-19 kai avanga Zoram Medical College-a enkawl mek raipuar pakhat chuan September 22 zan dar 10.00 khan nau a nei a; September 23 chawhnu dar 12.35 khan Covid-19 kai bawk ZMC-a enkawl dam tawh chu a nau pai zaichhuahsak a ni bawk. ZMC-ah hian Covid kai 55 enkawl mek an ni a, an zingah harsatna em em nei an awmlo tih ZMC hotute chuan an sawi.

Lawmpuina hlan
Mizoram Government Departmental Officers Association (MDOA) chuan nimin khan an member, an hnaa kaisang mi 13 hnenah lawmpuina an hlan a. Heng mi 13-te hi sawrkar department hrang hrang 9-a tunhnaia joint director leh director-a kaisang an ni.

YLA Day
September 23 kha Lawngtlai district-a tlawmngai pawl lianber – Young Lai Association (YLA) din champha vawi 46-na chu a ni a,YLA branch hrang hrangten an remchan dan angin midang tana thiltha tih nana hman a ni. Central YLA chuan kumdanga an tih thin angin Lawngtlaia damdawi in pathum bakah Lairam Motherless Home-ah tanpuina a hlan a; Siahatla YLA Branch chuan District Hospital Siaha-ah thisen unit 22 an pe a, Kalvary Healing Ministry hnenah Rs.5000 an hlan bawk.
Central YLA hnuaiah hian Sub-Hqrs leh Group 8 ve ve, Joint YLA pahnih awmin Branch 109 an awm a, member 45000 vel an awm mek.

ZPMY-in thlamuan
ZPM Thalai Hqrs. hruaitute chuan an MLA Pu Lalduhoma, a nihna atanga paihthlak (disqualify) tumin MNF party hma an la mek, tiin, hemi sawiho leh tawngtairual hun an hmang. An thuchhuah tarlan danin, Pu Lalduhoma hekna thehluttu MNF MLA-te leh Speaker tan pawh Pathian awmpuina dilsak turin an inngen tih sawiin, Pu Lalduhoma hi a inah kalchilhin an thlamua a, tawngtaina hun an hmang tih a tarlang bawk.

Bawlhhlawh thliarna tur sem
Kolasibah Solid Waste Manangement Bye-Laws tihpuitlinna atana bawlhhlawh thliarhranna tur, tawih thei leh tawih thei lo dahhranna bawm chu Nilaini khan sem a ni a. District bawrhsap Dr H Lalthlangliana a hmanpui.

Bawrhsap chuan Aizawl tih loah Kolasib chu Solid Waste Management Centre awmna hmasa ber khua a ni tiin, kumin October-a a taka hman tan beisei a ni tih a sawi. “Kolasib chu khaw thleng rem tak a ni a, Solid Waste Management Centre kan nei bawk a, he Centre tangkai taka hman a nih theih nan inkaihhruaina dan kan nei tawh bawk a, Mizorama khaw fai ber kan ni thei a ni,” a ti.

Kolasib khaw chhunga village council 17 hnenah bawlhhlawh bawm, tawih thei (a rawng hring) leh tawih thei lo (a rawng pawl) dahhranna hi sem a ni a, in 7662 hnenah pekchhuah tum a ni.

Traffic Police hnenah mask hlan
Directorate of Women & Child Development, Social Welfare Department chuan Aizawl Traffic Police-te Covid-19 leng kara an hnathawhte chawimawi nan leh Rashtriya POSHAN Maah 2020 (National Nutrition Month) denchhenin facemask an hlan.

Nilainia Traffic Control Room Aizawla hemi pual hun hmanah Women & Child Development director Vanlalpianpuii chuan Poshan Abhiyan leh Poshan Maah sawifiahin, Mizorama kalpui a nih dan a sawi a. Police-te leh Women & Child Develpment hi thawkdun tur leh tangdun tur an nihzia sawiin, “Police-te hah taka ram tana an hnathawh kan hriatpui a, kan chawimawi che u a ni,” a ti. WCD hmalaknaa Police-te nena an thawhho tawhnaah lawmthu a sawi bawk. WCD hian Mizoram Police Women Cell hnenah face mask hi an hlan bawk.

(THE AIZAWL POST – Tualchhung)

The Aizawk Post

Full>> ePaper Subscribe

 

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy